February 2, 2023; Mizoram police te chuan kumin 2023 chhungin Mizoram hmun hrang hrangah dan lova lakluh kuhva rah bag 1,206 (kg 67,600 vel) an man tawh a. Chung a inhnamhnawih nia hriat, lirthei khalhtu leh kuhva neitu mi 19 man an nei.

Mizoram police thuchhuah tarlan danin, kuhva rah an man te hi Myanmar atanga dan lova chawk luh a ni tlangpui a, an manna hmun te chu Chalbawiha Junction, Khankawn te, Chhungte khawi dai, Seling, Rengtekawn, Kharzawl veng, Bilkhawthlir ah te a ni.

Hetihlai hian January ni 30 khan dan lova khuhva tawlhruk chungchang ngaihtuah tura din Task Group on Illegal Arecanut chu an Task Group Chairman H. Lalengmawia IAS, Commissioner & Secretary Home Department kaihhruaina hnuaia meeting pawimawh tak neiin, Myanmar leh khawchhak ram dang atanga danlo a Mizoram, India a kuhva lo lut chungchanga hmalakna awm mek te tihchak leh zual dan tur an sawiho

Meeting chuan February thla chhung in district hrang hrang a danlo a lakluh kuhva chhekkhawl stocks awm zat khawn khawm zui zel ni se an ti a, hmun hrang hrang a danlo a kuhva kudam hrang hrang a awm mek te pawh a kudam chawp a kalh (seal) leh dan anga hma lak (legal action) anih theih nan Task Group in Customs Department ah report a thehlut ang a, February thla chhung a report hmuh belh pawh Customs Department ah report a ni leh ang tih an rel bawk.

Task Group chuan danlo a kuhva sumdawnna ah tumah inhnamhnawih lo tur leh, inhnamhnawih awm te pawh rang taka tawp san turin a hriattir in a ngen a ni.