August 5, 2022; Kum 2023 ah public holiday (sawrkar chawlh) ni 26 a awm dawn a, chung zinga ni 7 chu Mizoram pual bik ni pawimawh niin, a dang ni 19 chu India ram pum huap a ni pawimawh hrang hrangte a ni. Missionary day chungchangah ngaihdan leh pawmdan hrang deuh awm tawh mahse tihdanglam a ni lo a, a ngai angin state pum chawlh-ah puan chhunzawm zel a la ni.

General Administration Department (GAD) chuan August ni 3, 2022 khan 'Notification' chhuahin, kum 2023 holiday list hrang hrangte a tarlang a, public holiday ni 26 bakah, restricted holiday ni 33 a awm dawn.

Kum 2023 holiday list GAD in a tihchhuah ah hian, Mizoram ni pawimawh public holiday a puan bikah, kumin nen danglamna a awm lo a, a ngai ang bawkin, Missionary Day, State Day, Chapchar Kut, YMA day, Remna Ni leh MHIP Day te chu state holiday a ni chhunzawm leh ang.

Nakkum a sawrkar chawlh ni 26 awm tura duanah hian, Inrinni a tla, Idu'l Fitr (April ni 22, 2023) leh Muharram (July ni 29, 2023) te an awm a, Pathianni a tla, New Year's Day (January ni 1, 2023), Diwali (November ni 12, 2023) Christmas Eve (December ni 24, 2023) leh New Year's Eve (Demcember ni 31, 2023) te an awm bawk.