Aizawl January 12, 2023: Deputy CM Tawnluia chuan MNF chu Mizo Hnam hmahruaitu, Mizo Hnam tana hmatawnga kala sulsutu, Zofate tan, Zoram tan a kal zel dawn, a ti a. Zoram mipui beisei angin Lalpa hming lam chungin a kal ang a, 2023 hi hnehna an chan kum, malsawmna an dawn kum a ni zel dawn niin a sawi.

Vawiina Mizo Hnam Run Lunglei a hawn naah MNF General Hqrs Sr' Vice President, Deputy Chief Minister Tawnluia chuan, "Zoram mipuite tana thawk turin Pathianin kum 60 zet min hruai tawh, kan President leh kan chief minister zahawm tak Pu Zoramthanga, leadership nei tha Pathian tihtu zui tur kan nei hi lawmna chang i hre thar ang u. Amah ho ngeiin kumin 2023-a sawrkarna kan siam leh ngei ang tih ring ila,  kawng laka hnuchhiah mai turin Pathian-in min dah miah lovang tih i ring tlat ang u. Mawhphurhna erawh kan nei ve a, Kan taksa, rilru leh thlarau-in kan mawhphurhna hria se, theihtawp chhuahin, chhel tak leh taima takin hna thawk ila, midangte tan a malsawmna ni turin i luang chhuak zel ang u. Kumin 2023 hi Lunglei Hnam Run lungawi kum, hamthatna dawn kum a nih ngei ka ring a, Malsawmna dawngtu ni turin thawhhona tha leh inlungrualna tha tak nei chungin I kal zel ang u," a ti

Municipal chungchang sawi langin, "Lunglei hi village lian tak inhlawmkhawm awmkhawm ringawt a nih hi sawrkar ang pawhin  Mizoram khawpui pahnihna hi lainatawm kan ti a. mahni a ro in rel theihna khawpui, mahni sum leh pai hman tur in siam thei khawpui a nih theih nan Municipality hi i kalpui teh ang u," tiin, LMC chu kan hawng dawn ta a ni, a ti bawk.

Tawnluia chuan MNF chu mipui hmakhua ngaiin hma an la tih sawiin, "Mipuite hmakhua ngai a, sulsutu, mipui sawrkar a nih ang ngeiin mipui nen a innghengriala kan kal a mipuiin sawrkar zarzova an din khawchhuah zel theih nan ruahmanna kan siam a. SEDP hmangin chhungkaw 60,000 bul kan tan sak mek a.  First phase Second installmena hi kan pe leh dawn a. Sawrkar kumtharah chhungkaw 60,000 aia tam hnenah SEDP hi kan pe leh dawn a ni," a ti bawk.

Mizo Hnam Run Lunglei hawnnaah hian MNF Sub Hqrs Lunglei President leh Vice Chairman High Powered Committee Lunglei Lawmawma Tochhawng, Lunglei East MLA ni bawk chuan inlawmna thuchah sawiin, Lunglei South bialtu, Mizoram Bamboo Development Board Vice Chairman MLA Dr K. Pachhunga leh Lunglei North bialtu MLA Dr. Vanlaltanpuia, Chairman Mizoram Youth Commission te chuan thu an sawi bawk.