Aizawl October 25, 2022: Lawngtlai Areopagi-ah ZPM Lai District Headquarters chuan tukin khan mi thar lawmluhna leh vantlang inkhawm a buatsaih a. ZPM Working President K. Sapdanga chuan, "Kum 2023 MLA thlanah ZPM-in a hlangin Kalphung thar sawrkar siam kan tum a, Laifa an tel ngei tur a ni. MLA pangngai lo deuh tur te pawh kan lo beisei dawn," a ti. 

K Sapdanga chuan, “Lai District-a ZPM Meichher chhitute kan chhuang hle che u a, Chhim tawp atanga ZPM meichher chhem alh tak tak turin kan ring tawk che u a, in zarah ram pum a kang duai duai ang tih kan ring. Kum 2023 MLA thlanah ZPM-in a hlangin Kalphung thar sawrkar siam kan tum a, Laifa an tel ngei tur a ni. MLA pangngai lo deuh tur te pawh kan lo beisei dawn a ni,” a ti.  

ZPM Working President chuan, "Vawiina kan lawmluh te hnungah hian midang inkau mek tam tak an awm mek a ni," a ti a. "Chamdur Project, Kolodyne Multi Modal Transit Transport Project leh Mampui Airfield Project te hi a mal mala sawi tham an ni. Lawngtlai District-in theihna tam tak a neih te haider tur hian sual fe a ngai a ni. Heng project lian tak tak kan muthilhsan tlat mai hi ZPM chuan mak a ti. ZPM hi kum 2023 inthlanpui atan mipui ten min buatsaih hle niin kan hria a, ZPM hun a lo thleng a nih chuan Mizoram hian 'Look South Policy' a kalpui lo thei lo. Sawrkar tharah Zoram hmun pawimawh leh tangkai bera chantir turin mipuite inbuatsaih ang u. Buh kan ei duh chuan Chamdur project kan hawisan thei lo, electric kan duh chuan Kolodyne hydel project kan hawisan thei lo, Asia chhim chhak ram te nena insumdawntawn kan duh chuan KMTTP kan hawisan thei lo. South East Asia sumdawnna hmun pawimawh zingah Lawngtlai a tel ang. A lut lam kawtchhuah mai ni loin, a chhuak lam kawtchhuah a ni tel lo thei lo. Khawvelin a mamawh hmasawnna project pawimawh tak tak a ram neituten kan hlamchhiah lutuk hi a mak a ni," a ti.

K. Sapdanga chuan, "ZPM sawrkar hi mipui ten an nghakhlel a, a nghakhlel ber tur pawh Lai district mipuite kan niin kan hria a, chutianga hmasawnna hna thawk tur chuan MLA pahnih kan thawh dawn ni pawhin kan hria. He ram hi kan hmangaih a nih chuan a siamtu tur kan thawh dawn a ni mai a, thil mak a ni lo," a ti a. "Kan kalna apiangah mipuiten 'ZPM an sawrkar dawn' an ti a; nakkum inthlan lo awm tur hi hun dang ang lo takin neutral leh sawrkar hnathawk ten an nghakhlel hle; party-ah an tui thar thut tihna a ni lo, sawrkar kalphung an han en a, an tan hei aia mangan ngaihna a awm tawh lo," a ti a.

Pu Sapa chuan, "ADC te hi state hmasawn nana sawrkar inkhaidiat pawimawh tak a ni, chuvangin ram pum mit in la lo thei lo. Nimahse kan sawrkar hian sum siamnan a hmang mai mai a, council-in a hmuh tur ang a hmu thei tawh lo a, a hmuh chhun pawh a duh angin a hmang thei lo a ni. ZPM chuan hmasawnna hi a kil atanga thawh kan duh a, ramri atanga thawh kan duh a, a tum pawh kan tum a ni," a ti a. 

ZPM Leader chungchang sawiin Sapa chuan, "CM candidate atan VUC chuan Pu Duha min pe a, ZPM hian zaa zain kan pawm a ni. ZPM hian kum 2023 inthlan lo awm turah hian eng party nen mah thawhho a la rel lo, absolute majority sawrkar nei turin a inbuatsaih mek zawk a ni. Chumi atan chuan undivided chhimtuipui district atangin MLA pali chu kan thawh thei turah kan ngai. Thahnemngai taka thawk chungin, thlamuang takin lo awm rawh u," a ti.

Mi thar lawmluhte aiawha thusawitu Pu Thangchemsanga chuan, "MNF-ah kum 30 chuang ka awm a, MDC hial ka lo ni ve tawh a, ka lawm hle a ni. Engvanginnge kan chhuahsan tak? Hun rei tak ka lo awm tawhnaah hian Lai fate hi kan him tawh lo a ni tih chiang takin ka hmu a, kan hmasawnna tur pawh hi an ngaihtuah tak tak lo. MDC inthlan manifesto point pawimawh tak CM-in 'lo thaichhe rawh u' a ti a. Central-in 'ADC te pe rawh u' a tih pawh an phal lo a, a document pawh areopagi-ah ngei kan hal a nih kha. Chuvangin awmna chi-ah ka ngai tawh lo a, ka chhuahsan ta a ni," a ti.