ZALEN March 21, 2025 : Mizo Hnam Runah chhung inkhawm vawiina neih a, thusawitu Prof. James LT Thanga, Department of Economics MZU chuan, "Tunhnai kum 10 liam ta enletin Covid nasat kum tih lohah chuan kum 2024 - 2025 chhunga kan Revenue Deficit en hian kan phak bakin kan nung tih a lang chiang hle a ni. Hei bakah hian kum 2024 - 2025 hi kum 10 chhung en letin Mizoram sawrkar-in sum a puk tam ber kum a ni bawk a ni," a ti.  

Prof. James LT Thanga chuan, "Mizoram sawrkar budget kalphung enin eng ber nge an ngaih pawimawh ber, prirority an pek tih a hriat loh. Mipuite rawng kan bawlna turah e'nge sawrkar hian a dah pawimawh ber a hriat loh hi a pawi hle a ni. " a ti a. "Sawrkar-in budget a pharh tawh ṭum 2-ah hian kan leiba vaibelchhe 2000 chuangin a punbelh tih kan hmu thei bawk a ni," a ti.

MZU mithiam chuan, "Mipui hian kan ram sum leh pai dinhmun dik tak hi hria se ka duh a, zirtirna dik dawng se ka duh bawk a ni. Mipuiin an hriat thiam ve phak chiah loh hmanga insawi ropui a, an rilru suk thlek dik lo puttir tumte pawh awm thei a ni. Kan ram sum leh pai chungchanga zirtirna pe tur hian ka inpeih reng a ni," a ti a. "Democracy ramah party-te hi an pawimawh a, hnawl mai lovin siamṭhat kan tum tur a ni," tiin mipuite a chah bawk.

Prof. James-a chuan, zalen taka mipuiin social media hmanga ngaihdan kan sawi ṭhin chu hlu a tih thu leh lawmawm a tih thu a sawi a. "Mipuite thusawi hi sawrkar pawhin a bengkhawn tur a ni. Tin, kan ram sum leh pai dinhmun leh budget-te hi hriatthiam kan tum ve tur a ni. Kan ram budget-te hi hnatlang rorel a, rel mai mai tur a ni lo," a ti a. "GSDP hi Mizoram sawrkar-in amaha a teh ngawt theih a ni lo. State dang nena inthlunzawm tam tak a awm a, chutia Mizoram bila lo teh ve ngawt theih a ni lo. Kalphung fel tak neia teh tur a ni," a ti bawk.