Aizawl October 1, 2024 : Vawiin khan ZPM leh HPC party te chuan 2024 Sinlung Hill Council inthlanpui lo awm turahb thawhhona thuthlung Aizawl Press Club-ah an ziak a, ZPM aiawhin President Lalliansawta chuan hming a ziah hnan a, HPC aiawhin President Rohringa chuan hming a ziah hnan ve bawk.

He hunah hian ZPM President Lalliansawta chuan, "Kum 2023 MLA General Election hma khan keini ZPM leh HPC te chuan thawhhona thuthlung kan lo ziak tawh a, 2023 MLA inthlanpuiah khan Bial pathum Serlui, Tuivawl leh Chalfilh ah te kan lo thawkho tawh a ni."

"Kha thawhhona thuthlungah khan 2024 Sinlung Hill Council inthlanpuiah thawhho zel ni se kan ti a, chu chu bawhzuiin ZPM leh HPC te chu kan inbe chho zel a, duhdan in ang lo leh beisei dan in ang lo te siam rem zelin, hetiang a thawkho thei tur hian lungrual takin thutlukna kan siam chho thei ta a ni," a ti.

Sinlung Hills Council hnuaiah hian Constituency 12 awm in MLA constituency 3 a huam a. kum 2019 khan mipui kutthlakna inthlan hmasa ber chu neih a lo ni tawh a, kha mi tum khan MNF leh HPC inkawp chuan sawrkarna an siam a. Tun dinhmunah hian ZPM leh HPC ten sawrkarna siam mekin, 2024 inthlan lo awm turah pawh thawkhova sawrkarna siam tumin thawhona thuthlung hi an ziak a ni.

Lalliansawta chuan, "Tuntum inthlanah hian Keini party pahnih te thawhhona hian Hmar mipuite beiseina a siam thar nasa a, Sawrkar lai kalphung thar kalpui mek te mipuiin kan lakah beiseina sang tak an nei chho zel a, chutih rualin HPC te hnam movement kengtu, nunna tam tak chana lo beitu te an lo ni bawk a, kan thawh hona hian hnam thinlung pu Hmar mipuite nasa takin kan lama tang turin a chawk tho mek a ni," a ti bawk.

ZPM leh HPC tangdun hian an sawrkar chuan 2023-a an thawhhona thuthlung te bawhzui zel an tum a. HPC Headquarters pawh Sakawrdaiah dah an tum. Kum 1994 a Memorandum of Settlement te, Sinlung Hills Council Act 2018 te tihlawhtling turin hma lak an tum a, Sinlung Hills Council thuneihna (Subject) mumal taka siam an tum bawk.

Thawhhona thuthlungah chuan:-

1. Bial 12 awmah hian ZPM in bial 8 an chang ang a HPC in bial 4 an chang ang. ZPM chan tur bial te, Bial 2na-Phuaibuang, Bial 3na- Suangpuilawn, Bial 4na – Vanbawng, Bial 5na – Ratu, Bial 6na- New Vervek, Bial 8na – Sakawrdai North, Bial 9na – Zohmun,Bial 11na -Saipum

2. HPC chan tur Bial te :- Bial 1na – Khawlian, Bial 7na Sakawrdai South, Bial 10na – N. Tinghmun leh Bial 12na – Saiphai

Thawhhona thuthlunga ziak angin Ministry ruangam hi chu ministry siam hunah Party pahnih te hian an la duang dawn a ni.