Mumbai City FC chuan a player zinga chawimawina dawng hnem ber pawl, Lallianzuala Chhangte chu 2026-27 season thleng an hnena khel turin a contract neih lai an pawhseipui tih an puang.

January, 2022-a Mumbai club a zawm atanga team hlawhtlinna kawnga thawhhlawk ber zinga mi, Lianzuala hi club leh ram tana player pawimawh a ni mek.

Ke vei lam hmang thiam, Mizo tlangval hian Indian Super League 2023-24 liam taah khan goal 16 thawk chhuakin season khata a thawh chhuah tam ber tum a nihrual phak a. Goal 10 thunin a thiante tan goal ruk a siamsak bawk.

Season hmasa leh chiah, 2022-23 khan hetiang zat chiah goal thawk chhuak tawhin Indian zinga season zawna goal 15 leh a chung lam thawk chhuak tling thei hmasa ber a ni.

Lianzuala hian 2022-23 khan Mumbai hi ISL League Winners’ Shield a lakpui hnuah season liam taah khan a che tha zui hle a. ISL semifinal-ah goal pawimawh taka thun bakah ISL Cup a lakpui leh bawk.

ISL 2022-23 khan player tha bera thlan niin Golden Ball a dawng a, Durand Cup 2022-ah Golden Boot a dawng bawk.

A hlawhtlinna ropui tak zingah ISL-ah inkhel vawi riat zet a zawna goal thunin Indian zinga hetiang ti thei hmasa ber a ni a. Indian striker ropui, Sunil Chhetri-a nen chiah ISL-a team an hmachhawn tawh zawng zawng laka goal thun vek thei awmchhun an ni bawk.

‘Mizo Flash’ tia a hming lem an phuahsak, kum 27 mi hi 2022 AFC Champions League-ah pawh hming chherin Islanders hi an group-ah pahnihna a nihpui a, Indian club zinga hnehna chang thei hmasa ber a nihpui bawk.

Mumbai City Arena-a kum eng emaw zat la awm rih tura rinawmna thu tiam thar, Lianzuala chuan, “Mumbai City FC-a la awm zel tur hian ka inngaihtuah buai lem lo; fan-te an tha a, club chhungkaw boruak a tha em em bawk,” a ti.