Aizawl July 19, 2024 : Union Minister of State for Agriculture and Farmers Welfare changtu Bhagirath Choudhary chuan India ram chu Prime Minister Narendra Modi-a kaihhruai sawrkarna hnuaiah kum 2029-ah chuan kuthnawktute sum lakluh a let li-in a pun tur thu a sawi.

He thu hi vawiin khan BJP Mizoram Pradesh, Pisa, Upper Republic ah thutharthehdarhtute a kawmnaah a sawi a, Minister chuan Mizoram chu Pathian thil pek (God’s Gift) leilung hausakna tha tak nei a nih thu a sawi a, a bikin Organic farming ah theihna bik tha tak a neih thu a sawi.

Hetih rual hian Minister Bhagirath Choudhary chuan thil thar chhuah hralhna tur ram pawn thlengin zau takin inhawng mah se, a hralhna tur kawng leh inkalh phawhna a that loh thu a sawi a, hemi kawngah hian central leh state sawrkar a thawktute tanrual a pawimawh thu sawiin, tourism hmasawnna tur leh loneitutete dinchhuah theihna tak tak tur chuan khaw kar kawng, fourlane-te leh railway thlengin tun aiin tih changtlun a ngaih thu a sawi.

Zawhna chhangin Minister chuan khuarel chhiatna leh thil chi hrang hrang avanga loneitute leh kuthnathawktuten harsataka an tawhte chu central sawrkar atangin puihna a awm thu a sawi, amaherawhchu state sawrkar nena thawhhona a ngaihthute, state sawrkarin report a pek behchhanin zangnadawnna pek thin a nih thu a sawi. Minister chuan Loneitute tan pawh Crop Insurance (Inpeizawnna) pawh scheme a awm thu a sawi rualin Mizoramah hmala an awm meuh lo thu a sawi a, hetih rual hian sawrkar laipui chuan tanpui an inpeih reng thu a sawi bawk.

Union Minister of State for Agriculture and Farmers Welfare changtu Bhagirath Choudhary chuan sawrkar laipuiin Mizoram in tun aiia hma a sawn theihna tur kawng hrang hrang dap tura rawn tirh a nih thu sawi bakah hmalakna tur engmawzat a hmuhthute a sawi.