ZALEN March 12, 2025; Sports minister Lalnghinglova Hmar in infiamna-ah Mizote kan la sang lo tih kan hriat ngam a ngai tih sawiin, 2036 Olympic a Mizo infiammi te an tel ve ngei theihna turin theihtawp an chhuah mek tih a sawi.

Vawiin assembly session zawhna leh chhanna hunah memberte zawhna leh zawhbelhna te chhanga he thu hi sawiin, sports minister chuan, India in 2026 Olympic 2036 thlen a tum tak tak thu leh sum leh pai leh thil dangah pawh a inbuatsaih mek niin a sawi a, chutah chuan Mizo infiammi an tel ve ngei an duh thu leh chuta tan chuan theihtawp an chhuah thu a sawi.

Sports minister chuan 2036 Olympic ah Mizo an tel ve theihna tur Vision Olympic 2036 chu an buaipui ber a nih thu sawiin, "Chutah chuan Mizo infiammi tel ve ngei se kan duh a, zep tur a awm lo, medal pawh kan la sawi ngam lo a, tel ve chu kan tum ber a ni," ti bawkin, "Tun thlengin India aiawha Olympic a tel thei hi mi pahnih bak kan la nei lo. Sports hi kan buaipui a, kan sawi nasa a, kan la sang lo a ni tih hi kan hriat ngam a ngaiin ka hria...2036 Olympic atan Mizo naupang infiammi kum 8-15 inkar training pek an ni dawn...," a ti bawk.