ZALEN September 22, 2023 : 2B's Group of Companies, New Delhi, Chairman Henry Lalremsanga chuan a Ukil kaltlangin Meghalaya Chief Minister hlui Mukul Sangma chu Legal Notice a pe a, Meghalaya state Assembly-a a chungchanga a sawi danah a lungawi loh avangin insawifiah turin Meghalaya Trinamool Congress hruaitu ni mek hi a ti.

Zawlbuk Real Estate hotupa thin, Henry Lalremsanga Ukil JC Lalnunsanga, Advocate on Record, Supreme Court of India chuan Mukul Sangma-a'n a 'client' Drug Kingpin ti a sawi chu thu dik lo hualhual a ni a, thubuaiah lak theih a nih thu a Legal Notice pekah hian a tarlang. Dik lo taka a client an lo puh tawhna hi Special Court, ND & PS Act, Patiala House Court, New Delhi chuan 21.02.2018 khan Judgment & Order tichhuakin he case-ah hian inhnamhnawihna a nei lo tih Notice-a pekah hian a tarlang. "Meghalaya CM hlui hian a sawi loh tur tawp a sawi a ni. Ka client hian thiam lohna a nei lo tih hi court hian a tichiang vek tawh a ni," tiin JC Lalnunsanga hian ZALEN a hrilh.

Mukul Sangma hian an state Assembly-ah ruihhlo chungchang sawiho naah an Chief Minister Conrad K. Sangma chu drugs sumdawnnaah inhnamhnawihah a puh a, hetah hian Henry Lalremsanga hi 'Drug Kingpin' tiin sumdawnna kalpui dun-ah a puh. Mukul hian April, 2013-a Pseudoephedrite tablet, cheng vaibelchhe 6 hu man kaihhnawiha an man Henry Lalremsanga hi CM Sangma nen hian inzawmna tha tak nei, niin a sawi bawk a ni.

TMC hotu hian media lama thuchhuak behchhanin Henry hi Mizoram atanga 2003-a Delhi-a chhuk a, Bank hrang hranga thawk kual leh Delhi MLA hlui Ashok Ahuja fapa Arvind Ahuja nena dan lova sumdawnna pawh kalpui tawh leh Ahuja fapa driver kut atang hian Pdeudoephedrine tablet strip 2,52,680 an man sak tawh angin a sawi tel a ni.