ZALEN February 12, 2025 : Sipai Lammual leh a chhehvel luahtu hnuhnung ber tur chu 2nd Battalion Assam Rifles, Lakhimpur Battalion tia hriat ni bawk te hi an nih tak hmel a, An Commandant Colonel Mukesh Sauhta hovin sipai 600-700 velin tukin khan Lammual hi an chhuahsan a ni.

2nd Assam Rifles-te hi group thumah inthenin Aizawl an chhuahsan tan a, Srinagar an pan mek a ni. Group 1 'advance party' mi 100 vel chuan hmanni deuh khan Srinagar an lo pan tawh a, tukin a chhuak te hi Group 2 an ni a, a hlawmpui ber an a, sipai 600-700 vel an ni. Assam Rifles te hian Lirthei lian leh lirthei te hmangin Silchar an pan a, Silchar atangin relin J&K an pan ang.

Lakhimpur Battalion te hi Mizorama Assam Rifles hotupa ber, 23 Sector Assam Rifles Deputy Inspector General Brig. Girish Upadhya, SM, VSM leh Ex-Serviceman ten an thlahliam.

Sipai 200 vel awmna Group 3 te pawhin rei lo te ah Sipai Lammual leh a chhehvel chhuahsanin Srinagar an pan dawn a. Srinagar atanga anmahni thlak tura lo chhuk tur te hi 34th Battalion Assam Rifles-te an ni a, Wussan Battalion tia hriat an ni. Anni hi chuan Sipai Lammual lam hi an rawn pan tawh dawn lo va, Zokhawsang lam an pan dawn niin hriat a ni. Zokhawsang-ah an inbengbel tawh ang a - Sipai Lammual lam chu an hnuchhawn tawh dawn niin sawi a ni.