Aizawl: Aizawl ah two wheeler taxi 128 vel dinna (stand) a awm mek laiin, ni tin taxi service 600 vel an awm mek a, dinna chungchangah harsatna an tawh nasat a vangin service loh phahte pawh an awm mek ni a thudawn a ni.

Aizawl Two Wheeler Taxi Association (ATTA) hruaitute hnen a tanga ZALEN thudawn danin, taxi a pun mek laiin, stand siam belh a awm lo a, chu chu tun dinhmun a harsatna an tawh lian ber a ni mek. “Stand awm loin member kan inla tawp tawp rih a, kan buai khawp mai,” tiin, member 850 bawr vel an awm mek thu leh intlanchhawkah ni tin taxi 95 vel an din laiin, ni tin service a tlem berah 600 bawr vel an awm mek thu an sawi.

ATTA hruaitute sawi danin, tunhnai a sorkarin taxi permit 1,350 vel a pek chhuah tharte nen ATTA-ah member 2,000 an chuang thei dawn a, tun dinhmun pawh member thar ni tin an awm reng. “Stand kan neih sa taxi 128 vel din theihna chu taxi 800 bawr vel in kan intawm dawn a, a hahthlak dawn khawp mai,” ATTA hruaitute chuan an ti.

Two wheeler taxi stand siam belh chungchang hi ATTA hruaitute chuan Aizawl Municipal Corporation (AMC)-ah ngenna an thlen tawh a, ngaihtuah loh in a la awm niin an sawi bawk.