Inrinni zana zawh fel tak, Mizoram State 6 Red Snooker Ranking Tournament 2024-ah Lalsangzela a champion a, Khatla South tlangval hian kumina Mizoram chhung inelnaah nomawi pathum a la ta.

Mizoram Snooker & Billiards Association (MSBA) buatsaih tournament-ah hian final-ah Khatla South veng mi ve ve inhmachhawnin Zela hian K Lallawmkima chu 6-2-in a hneh.

Frame ruk la hmasa zawk zawk champion tuma inbeihnaah Lawma’n bul tan tha zawkin 39-0-a frame hmasa ber lain hmaa hruai a; mahse, frame hnihna atanga Zela invawrhin frame nga lai a zawnin a la zui a. Frame khat chauh lak a ngaih tawh laiin Lawma insangmar tha lehin frame sarihna la leh a; mahse, frame riatna chu Zela hian 47-19-a lain 6-2-in champion nomawi a la ta a ni.

Zela hi hi January thla khan Mizoram State 6 Red Snooker Ranking Tournament 2024-ah a lo champion tawh a. March thlaah Mizoram State 9 Ball Pool Championship-ah champion leh bawkin tun tum hi kumina nomawi pathum a lakna a ni ta a ni.

Kumina vawi thum a champion tawh bakah hian May thla khan Mizoram State 9 Ball Pool Ranking Tournament 2024-ah final a lut a. June thlaah Mizoram State 10 Ball Pool Ranking Tournament 2024-ah quarter final a lo thleng tawh bawk.

Mizoram State 6 Red Snooker Ranking Tournament 2024 hi Thawhtanni atanga MSBA Hall, Hawla Indoor Stadium, Republic Vengthlanga khelh tan kha niin Mizoram State Sports Council-in a sponsor a ni a. Mizoram hmun hrang hrang atangin snooker player 30 chuang an tel a ni.