May 29, 2023; A fanu kum 14 mi pawngsual a vawi tam tak chetsual pui thin tu kum 46 mi chu chu Special judge ( POCSO Act) Aizawl District Court Vanlalenmawia chuan thiam loh a chantir a, May 31, 2023 ah hremna a puang ang.

Court thuchhuak a tarlan a nih danin, a fanu kum 14 mi chu 5.8.2013 khan ramhnuai an thingphurhna ah a pawngsual a, a hnuah raiin, kum 2015 September thla khan a fanu chuan a pa fa chu a hring a ni.

A pa chuan kum 2018 thlengin a chetsualpui thin a, a pawngsual hnuhnun ber chu August 2018 ni a hriat a ni. Ni 22.11.2018 khan a nuin Police Station pakhat-ah FIR thehlutin thubuai siam sak a ni a, vawiin khan Special Judge, POCSO Act leh District & Sessions Judge ni bawk chuan thuhretute a koh hnuin thiam loh a chantir a, a tan ni atangin bail phal a la ni lo. Tunah hian central jail ah a tang mek a, May 31, 2023 ah hremna puan a ni ang.

POCSO dan hnuaiah chuan kum 10 aia tlem lo hremna pek tur a ni a, damchhung thleng pawhin tang turin a hrem theih bawk.