February 7, 2024; Mit (eye) lamah harsatna a tawk a, luak danna leh nachhawkna nen exam beiin, a vawi khat examna ah MCS a inziak tling. Open school atanga pawl 12 pass a ni.

Tunhnai a Mizoram Public Service Commission (MPSC) in result a tihchhuah ah Persons With Disabilities (PwD) quota atanga Mizoram Civil Service (MCS) tling, Lalngaihawmi (31) D/o Lalbiakdika, Mission Veng, Aizawl hian Home Mission School a pawl 12 a zir laiin a Mit lamah harsatna a tawk a, pawl 12 pawh Open School atangin a pass ta nghe nghe.

Pawl 10 chu St. Paul's atangin 1st Division ah a pass thung a, Open atanga pawl 12 a zawh hnuin, Pachhunga University College (PUC) ah zirna a chhunzawm a, a graduate hnuin, Hyderabad lamah zirna a chhunzawm.

Kum 2019 atanga 2022 chhung PUC ah guest lecturer in a thawk a, 2022 atangin PhD a chhunzawm a, PhD a tih mek laiin, a vawi khat examna ah MCS a inziak tling a ni.

Ngaihawmi hian lehkha a zirlai leh MCS a exam laiin harsatna a tawk nasa hle a, hnai tak atang lo chuan ziak a chhiar thei lo, chu chuan a lu a ti na a, a luak a ti chhuak thin bawk.

"Luak danna nen, nachhawkna nen exam ka hmachhawn a, MCS ka tling tih ka hriat tirh pawhin ka ring thei mai lo..." tiin amah betu ZALEN a hrilh.

"Ka tan zir nasat a ngai bik a, khap chanve vel atang lo chuan ziak ka chhiar thei lo, chu pawh ka Mit dinglam chauhin a ni. Hemi avang hian ka zirna kawng a thui bik hle a. Mahse kawng pakhat a awm chuan kawng dang a awm zel tih hi ka ngaihdan a ni," Ngaihawmi chuan a ti bawk.

A taksa a harsatna a neihin bawhbeh chang nei mahse, huaisen takin a tho chhuak a, kawng awmchhun nia lang chu bawhin, harsa hle mahse kawng dang a hreuh lui tlat a, tunah chuan hlawhtlinna duhawm tak a chang ta...a hming chu Lalngaihawmi a ni e...