November 15, 2022; Mizoramin International Tourism Mart (ITM) a thlen laia neih tum 'A ruala tingtang perh tam ber' (largest guitar ensemble) world record siam tumna chu hmalakna thui tak kalpui ni tawh mah se, tel tum inziak lut an tam tawk rih loh avangin neih theih a ni dawn rih lo.

Vawiin, November ni 15 a Mizoram in a thlen tur Tourism Kutpui (ITM) chungchang a thuthar thehdarhtute a office chamber, MINECO a a kawmna ah zawhna chhangin Tourism minister chuan, Mizoram in ITM a thlen lai a 'A ruala tingtang perh tam ber' world record siam tumin ruahmanna siam a ni tih a sawi a, hetihlai hian tel tum inziaklut an tam tawk rih loh avangin tun maiah chuan neih theih a ni dawn lo tih a sawi.

Tourism minister chuan, Mizo Zaimi Inzawmkhawm (MZI) leh Central YMA te nen tangkawp a, world record siam tumna chu a hlawhtlinna mipuiah thui tak a innghat tih sawiin, ruahmanna an lo siam tawh angin world record la siam ngei chu an duh dan a nih thu te, tel tum inziahluh theih reng a la nih thu leh, Pathian zarah an la nei thei ngei turah pawh an ngai tih a sawi. Tourism minister sawi danin, 'A rual a tingtang perh tam ber' world record siam tumnah hian 'Insuihkhawm leh zai i rel ang u,' tih chu rem tura thlan a ni.

World record siam tumna ah hian a bultumtu Tourism department chuan mi 7,500 tling thei turin hmalakna a kalpui a, YMA branch tinte hnenah an huam chhunga tingtang nei zat hre tur leh October ni 20, 2022 ral hmaa report pe turin a lo hriattir tawh.