Aizawl: Tourism department, Mizo Zaimi Inzawmkhawm (MZI) leh Central YMA tangkawpte buatsaih tur, ‘A ruala tingtang perh tam ber’ (largest guitar ensemble) world record siam tumnaah tel duhte an inziak lut mek zel a, he hunah hian mi 7,500 tel turin ruahmanna (target) siam a ni.

Tourism department hotute hnen atanga ZALEN thudawn danin, November 17, 2022-a a ruala tingtang perh tam ber world record siam tumnaah hian mi 7,500 tlin theih ngei an inbeisei a, ‘Insuihkhawm leh zai i rel ang u’ tih hla hmangin record siam tum a ni.

Mizoramin International Tourism Mart 2022, November 16-18 chhunga AR Ground, Aizawla a thlen turah a ruala guitar perh tam ber hmangin world record hi siam tum a ni a, tourism department chuan YMA branch tinte hnenah an huam chhunga guitar neih zat hre tur leh October 20, 2022 ral hmaa report pe turin a lo hriattir tawh bawk.