ZALEN August 4, 2025 : Mizo Hnam Run chhung inkhawm chu vawiin khan neih a ni a. Hun hnihna political session-ah MNF President Zoramthanga, Ex-Chief Minister chuan thusawiin, Mizoram Sawrkarin a ruka State Capital Aizawl atanga Thenzawla sawn a tum dan kalphung chu thil kalhmang a nih loh thu leh Mizoram Mohammad Bin Tughlag a nei ta ni berin a lang, a ti.

Zoramthanga chuan, "Kumin 2025, April ni 24 khan Seema Rani, section officer (AMRUT-IIB), MoHUA, New Delhi chuan Chief Secretary leh Resident Commissioner, Mizoram hnenah, 'Shifting of State Capital from Aizawl to Thenzawl, Mizoram' tiin DPR siamna tur chungchang lehkha a thawn a. Hei bakah hian sawrkar lehkha kan hmuh theih hrang hrangah Mizoram state capital Aizawl sawnna tur thu hi a chuang a ni."

"Hemi chungchangah hian Chief Minister-chuan Aizawl khawpui tawt lutuk tihziaawmna tura ‘peace city’ din tum a nih thu bak hi mipui ah puanzar a la nei lo a, NGO te leh Party hrang hrang bakah Zoram mipuite pawh rawnna pakhat mah a awm hriat a ni lova. Hetiang thu liantham hi chu Cabinet Meeting thutlukna tal pawh awm tur nia a lan laiin, chutiang chu Zoram mipuite hian kan hrelo a, Kan Chief Minister thil tih dan hi thil nihphung pangngai nilo, mipuite tana pawmpui remchang lo a ni a, MNF tan pawh Khawpui sawn tum dan kalphung chu pawm chi ni lovin, a tha lo kan ti takzet a ni," a ti.

MNF President chuan, Mizoram state Capital Aizawl hi Thenzawlah sawn dawn pawh nise, Aizawl mipui tam zawk fein rem an tihpui loh tur a ni a. Rem an tihpui loh mai ni lova, kan sawrkar kalpui dan kalphung chu an nuih tiza tur a ni. Tun dinhmunah Khawpui sawn chu thil harsa tak, sum leh pai tam tak luanralna tur leh mi tam tak nghawng tur a nih avangin, mahni duhthua thil kalpui ngawt chi a ni lo," a ti bawk.