Aizawl: Vawk natna hlauhawm tak, African Swine Fever (ASF) laka Mizoram a him theihnan sawrkarin state dang atanga vawksa lak luh a khap chungin a rukin Shillong vawksa rep a lo lut reng nia thudawn a ni.
Zalen-in thu a dawn danin ASF vangin Assam-ah vawk 20,000 chuang an thi tawh a, hetiang deuh bawk hian ASF hri kai nia hriat vawk thahnem tak chu Meghalaya-ah an thi bawk a. Heti chung hian mi thenkhat chuan Shillong vawksa rep an rawn phur chho reng tho va, bawngsa rep karah an phum ru niin an sawi.

Meghalaya-ah hian district eng emaw zatah hri hi a leng ve mek a. Shillong khawpuia vawk an talh hi Vety enfiah pawh ni lem lote an ni.

Vawksa rep, ganja leh zu tawlh ru an awm nia an hriat avangin November thla khan Shillong-a Mizoram sawrkar aiawh leh Group YMA te chuan meeting neiin hetiang ti thinte chu ti tawh lo turin an ngen a. Vairengte leh Kolasib YMA-te chu lirthei bungraw phurhte lo enfiahsak (check) turin an ngen a; mahse, Covid avangin bungrua an lo check vak ngam lo a. Sawrkar gate-ah te uluk lehzuala check nise an duh tih Shillong YMA hruaitute chuan Zalen an hrilh.

State pawn atanga vawksa rep lak luh chungchangah hian AH&Vety department chuan Vairengte check gate-ah an theih ang ang chuan an lo enfiah ve tih Zalen an hrilh a. “Engtin emaw intelligence atanga an phur a ni tih kan hriat loh chuan lirthei zawng zawng check vek theih a ni lo a. Chubakah kan check gate hi an hel chuan tihngaihna a awm si lo a, a buaithlak khawp mai,” an ti.

AH&Vety thawktute chuan Mizoramah African Swine Fever case an la hmu lo tih an sawi a; mahse, thenawm state leh Myanmar-ah hmuh a nih tawh avangin fimkhur a ngai hle tih Zalen an hrilh a. “Tun hnaiah pawh Manipur-ah vawk thi eng emaw zat a awm a, hei vang hian ramri depa khuate chu finkhur turin kan hriattir a. Hei mai bakah department thawktute pawh tumah mahni post chhuahsan lo turin kan hriattir a ni,” an ti bawk.