July 22, 2023; An ramvahna a a thianpa kaphlum a, a ruang phum zuitu a puh chu court in thiam loh a chantir.

Champhai Cable Network (CCN) in a tarlan danin, kum 2018, February ni 23 khan Lalbiaknia leh a thianpa Lawmkima te chu an ram vak a, sa an channaah Lalbiaknia hian a thianpa Lawmkima chu Sanghal emaw tiin a kap palh a, Lawmkima hi ka pawh chhawn lovin a boral nghal a ni.

Lalbiaknia hian mi dang hrilh lovin Lawmkima ruang hi a phum bakah a silai leh a iptepui thukru-in a hawsan a, Lawmkima hi a haw ve tak loh avangin khawtlangin an zawng a, Lalbiaknia hian a thianpa Lawmkima hian a hawsan nia sawiin a awmna a hriat bik loh thu a sawi a.

Ni 5 chhung an zawn hnuah a ram vahpui Lalbiaknia lo rinhlelh tur dang an awm loh avangin thu zawhfiah turin police-te'n an la a, Lalbiaknia hi police-te hmaa a inpuan hnu, February ni 28, 2018 khan Lawmkima ruang hi phawrh a ni ta a ni.

Tualthattua puh Lalbiaknia hi Addl District & Session Judge Sylvie Ralte chuan nimin khan thubuai pathumah thiam loh a chantir a, 304 (a) IPC - tum reng vang ni loa tualthah thubuai-ah kum 2 lung in tang tur te, 201 IPC - ruang phum leh evidence tih bo thubuaiah kum 2 lung in tang tur leh 27 (1) Arms Act, Dan lo anga mi silai hawh thubuaiah kum 3 lung in tang turin a hrem a, heng thubuai pathuma thiam loh chantir a nihna hi hlawm khatah dahsakin kum 3 chhung Lung in tang tur leh Rs. 2,000 chawi turin Lalbiaknia hi court chuan a hrem ta a ni.

Court chuan dan ang thlapa silai neitu pawhin, dan ang thlapin silai a hawhtir a nih loh chuan a hawhtirtu chu thla 6 aia tlem lo Lung in tang tura hrem theih a nih thu a sawi a, silai neitute chu dan ang thlap a nih loh chuan midang silai hawh tir mai mai lo turin Court chuan a hriattir a ni.