Aizawl: Health Minister Dr. R.Lalthangliana chuan, “COVID-19 test chungchangah symptom nei, mahni inringhlel tel bawkte tan a thlawna sample test-sak turin ruahmanna kan siam mek a, reilo teah ruahmanna kalphung kimchang nen kan ti tan thei dawn a ni,” a ti.

Nimin tlaia mipuite hnena thuchah a siamah Health Minister chuan mi tinte fimkhur taka awm chhunzawm zel turin a ngen a, “COVID-19 symptoms kan tih mai, khuh ro, khawsik, hritlang, kawthalo, hrawk thip, rim hriatna hloh leh a dangte kan nei a nih chuan a rang thei ang berin COVID19 helpline-ah inhriattir turin ka ngen a. COVID-19 positive nih hi thil hlauhawm leh tihbaiawm angah ngai lo ila, positive-te pawhin a eng lam hawi zawngin rilru leh ngaihtuahna hmang ula, nangmahni enkawltuten theihtawpchhuahin an enkawl reng che u a, pawn lam mi thiamte pawh an rawn reng thin a ni tih hria ula, zoram chhung bakah khawvel hmun hrang hrang atangin kan tawngtaipui reng che u a ni,” tiin, “Rapid Antigen Test awlsam zawka kan tih theih nan kan hotuten ngaihtuahna an seng mek a, reilo teah Aizawl khawpui chhung laili leh pan awlsamna hmunah mobile testing tihna tur ‘kiosk’ dah a ni ang,” a ti bawk.

Health Minister chuan zirna in te hawn leh tan anih avangin zirlaite chu fimkhur turin a chah nawn a, sikulah an thiante nen note bu, tiffin leh thil dangte inhman tawm lo turin a chah a. “Hostel-ah zirlai, khaw pawn leh thingtlang atanga lo kal, khawpuia chhungte belh tur nei lote chauh admit tur an ni a. RAgT negative chauh admit tur niin test man hi mi pakhat tan Rs. 500 zel a ni a, hei aia tam hi tuman lak loh tur a ni a. Sawrkarin test phalna a pekte lo chuan RagT sample test hi tih loh tur a ni,” a ti a. “A theih chen chenah huau huau leh mipui punkhawmna ang chi hi huaihawt lo rih ila, thil tul tâwpkhâwkah lo chuan pâwn chhuak lo ila, thenawm khawvêng inlênpawh pawh hi a tul tawpah lo chuan i insum chhunzawm rih hram hram ang u,” a ti bawk.

IDSP chhinchhiah dan report thar berah Mizoram pumah COVID-19 sample 95,230 test tawh niin RT-PCR laboratory-ah sample 57,110 test a ni a, TrueNAT hmangin sample 5,518 kan test tawh a, Rapid Antigen Test 32,602 tih tawh a ni. Mizorama positive hmuhchhuah zawng zawng 2245 zinga 946 (42.14%) hi Mizoram leilungfate an ni a, 1299 (57.86 %) hi ram leilungfa ni lo, hnamdang kan tihte an ni a. Positive hmuhchhuah zawng zawng zinga 1558 (69.40%) hi Mizoram pawn atanga lo lut Travel history nei kan tih thinte kha an ni a, tualchhunga inkaidarh (local transmission) hi 687 (30.60%) an ni.