September 14, 2023; District Addl & Session Judge Champhai, Sylvie Zomuanpuii Ralte chuan ram an riahnaa a vahnu thattu-a puh, Chingsianzovi chu thiam loh chantirin kum 10 chhung lung in tang tur leh Rs. 5,000 chawi turin a hrem.

Nikum 2022 February thla khan Chingsianzovi, Zonunmawii ti-a koh Khawzawl Zuchhip veng leh a vahnu Catherine T Biaksiami te chu Lo-ah thlai la turin an riak a, a tuk zingah Chingsianzovi hian Khawzawl Police Station-ah misualin an tihbuai thu leh a vahnu Catherine T Biaksiami chu thlamah phuar betin an kalsan niin a report-a, Police-te hian thlam an thlenin Catherine T Biaksiami chu thiin an hmu a ni.

He thil thleng chungchangah hian rinhlelh thu-ah Chingsianzovi hi thu zawhfiah turin Police-te chuan an man a, Police-te hmaah hian a thah a nih thu a puang a ni.

Thil awm dan hrang hrang Court-in a zirchian hnuah Chingsianzovi hian tum lawk vang reng ni lo leh a zu ruih sual avanga a vahnu tihpalh thila tihluma ngaiin IPC Sec 304 hnuaiah thuam loh a chan tir a, hei bakah hian Police hnena thu dik lo a hriattir avangin IPC Sec 182 hnuaiah thiam loh chan tir a ni bawk.

District Addl & Session Judge Sylvie Zomuanpuii Ralte chuan kum 10 chhung lung in tang tur leh Rs. 5,000 chawi turin a hrem a, a pawisa chawi tur hi a pe tla thei lo a nih chuan thla 1 dang a tan belh leh dawn a ni.