Mizoramah Force Motors dealership vawi hnih tihtawp ni tawh mah se automobile lama tawn hriat nei tak, LBS Group chuan la lut thar lehin, Inrinniah Bawngkawn South YMA Hall-ah Force Motors Limited President Rakesh Maru chuan dealership a hawng.

Maru chuan an inpekna leh an hnathawh dan avangin LBS Motors chungah rinna an nghat tih a sawi a, hlawhtling taka an kalpui theih nan duhsakna a hlan rualin kawng hrang hrang - service, spare part leh traning lamah an pui dawn tih a sawi.

LBS Motors Managing Board member H Ngurdingliana Ngurte chuan mi hrang pahnihin Mizoramah Force Motors dealership an kalpui tawh a, chhan hrang hrang avangin a tawp ve ve tih a sawi rualin an dil vanga hmu an ni lo va, Force Motors-in Mizoram dealer ni tura an ngenna an hnawl hnuah intiamkamna tha tawk nen inremna an siam fel niin a sawi.

LBS Group-a an hotupa, Ngurdinga chuan, "2019 khan kan indawr tawh a; mahse, kum li hnuah kan puitlin thei chauh a ni. Central Scheme atangin Mizoram Veterinary Department hnenah ambulance 28 kan hralh tawh a, heta hlep kan neih hmang hian dealership kan hawng thei chauh a ni," a ti.

LBS Group hian November 29, 2014 khan Mizoramah Suzuki two-wheeler dealership hawng tawhin an hlawhtling hle , September 28, 2022-ah Kia car dealership hawng lehin Force Motors hi automobile lama dealership hrang pathum an hawnna a ni.

Bawngkawn Brigade Veng, LBS Kia Servicing Centre Building-ah LBS Force Motors showroom leh service centre a awm kawp nghal a. A hmunpui lama an hotuten an phurpui avangin beiseina sang tak an neih phah.

Force Motors hi mihring phur chi sumdawnna lirthei siam lamah an insawrbing viau a, Light Commercial Vehicles (LCV) leh Multi Utility Vehicles (MUV) siamtu an nih bakah Sports Utility Vehicles (SUV) an siam tel bawk.

1958-a din Force Motors hi India rama Van siam chhuak hnem ber an ni a, an lirthei zingah SUV fak hlawh tak Gurkha phei chu Indian Army-in hmangin an leisak tam tawh hle.

An rintlak a ni tih lantirna pawimawh tak chu khawvela car company lian - Mercedes, Rolls-Royce leh BMW-in an engine leh drive line siam an leisak nasa viau a ni.

Tunah hian Traveller (bus chi hrang hrang), Trax (cruiser, ambulance, delivery van), Citiline, Gurkha leh Urbania bakah tractor an zuar chhuak mek a ni.