ZALEN, Apr. 26, 2025: Roman Catholic hotu lu ber, Pope Francis-a sunna Mass thianghlim chu khawvel hmun dangte rualin Mizoramah pawh Aizawla Christ the King Cathedral-ah neih a ni.

Thawhtanni tuka thi, Pope Francis-a hi an ram huna Zirtawpni chawhma (India-a chhun dar 01:30) khan Vatican City-a St Peter’s Basilica tuala Baroque plaza-ah vui inkhawm a ni a, hemi rual hian khawvel hmun hrang hranga Catholic kohhrante chuan a sunna inkhawm an buatsaih a ni.

Mizoramah chuan Pope Francis Sunna Mass Thianghlim hi Kulikawna Catholic biak inah neih a ni a, Aizawl Bishop Most Rev Bishop Stephen Rotluanga’n a hlan.

He hun hmang hian Mizoram hmun hrang hrang atangin an kalkhawm a, puithiam thahnem tak an tel a. Bishop Secretary Rev Fr Jerome Vungbiakdika’n Pope chanchin chhiarin a sawi a, inkhawm urhsun neih chhunzawm a ni.

Kum 13 chhung Catholic kohhran hotu lu ber nihna chelhtu, Francis-a hi ama duh angin vui a nih zawh hian Rome khawpuia Santa Maria Maggiore Basilica-ah phum a ni.