ZALEN August 7, 2025 : Lengpui Airport Forum chuan RTI hmanga zawhna Mizoram Sawrkar GAD-Aviation Wing-in 2.7.2025-a chhanna atangin AAI-ah bawhzuina tak tak a la awm lo tih hriat a ni an ti a, Lengpui Airport tha, changtlung leh him neih thuai anih theih nan sawrkarin hma la thuai turin ngenna an siam.

Lengpui Airport Forum chuan Lengpui Airport chungchang hi NGO Co-ordination Committee te pawh in CM-ah rawtna an thlen tawh thin a. Joint City Student Union te, MSU Shillong leh Shillong YMA group te pawhin Chief Minister hnenah kumin kum tir chho ah lehkha thehlut in, state dang te tih dan a Airport Authority of India (AAI) kutah hlan tur a rawtna te an lo thlen tawh a. Airport enkawl dante zir chiangin Booklet pahnih an ti chhuak tawh bawk.

Chief Minister Lalduhoma Delhi a zin-in tum hnih lai Union Home Minister Amit Shah nen Lengpui Airport chung chang hi an lo sawi tawh bawk a. Pu Amit Shah in Aizawl-a a lo zin tum, March ni 15, 2025 khan NGO Coordination Committee ten an hmuh tumin Lengpui Airport chu thla 3 chhungin AAI kut ah hlan fel nise, thla 6 chhung-in ti changtlung tur in hma lak nghal anih tur thu a lo hrilh a ni

CM Delhi zin haw-in Assembly House-ah March ni 13, 2025 khan Amit Shah nena an inbiakna avangin 'AAl lam kawng zawh thei thut anih mai theih thu' a sawi tawh bawk a ni. Hemi chungchanga RTI hmanga zawhna Mizoram Sawrkar GAD-Aviation Wing in Dt. 2.7.2025-a chhanna atangin bawhzuina tak tak a la awm lo tih hriat a ni. Lengpui Airport tha, changtlung leh him neih thuai anih theih nan Sawrkarin hma la thuai turin an ngen a ni.

Mizo mipui te chhuahka leh 'lifeline' ber pakhat Lengpui Airport thatna tur a hma thlir thui tak nei te ngenna leh tun hma pawha thil la awm ngai reng reng lo Amit Shah-in duhsak taka Airport tha Mizoram in a neihna tur a commitment leh offer tha hi a hun tiam ral hma thla hnih vel chauh awm tawh hi a liam hma ngeiin Chief Minister leh a kaihhruai Sawrkar hian ti hlawhtling ngei tur leh hma la nghal turin Lengpui Airport Forum chuan a ngen a ni.