Aizawl August 19, 2022 : Aam Aadmi Party (AAP) chuan Mizoram sawrkarin mirethei ten an damloh ni khuaa an inekawlna tur Mizoram health care scheme atan budget ah cheng khat mah a dah lo chu mak an tih thu an sawi.

Vawiin khan Aizawl Press Club ah chanchinbumite kawmin AAP Organising chairman Andrew Laltlankima chuan RTI hmanga zawhna an siamah Mizoram sawrkarin damlo bill a pek loh mi 27,158 awmin heng mite hnen atang hian Rs. 74,04,99,065 ba a nei tih a sawi a. Andrew Laltlankima chuan kum 2018 atang khan damlote inenkawlna sum hi budget ah dah a ni tawh lo niin a sawi a. Mizoram State Health Care scheme hnuaia inziaklut pawh an tlem hret hret nia sawi bawkin kumin ah pawh chhungkaw 39,505 chauh an inziaklut niin a sawi bawk.

Zawhna chhangin AAP hruaitute chuan membership drive an kalpui mek tih an sawi a. India rama an hotu ber AAP Convener Kejriwal chuan remchang hmasa berah Mizoram rawn tlawh a tum niin an sawi bawk.