Aizawl August 26, 2024 : Aam Aadmi Party, Mizoram chuan Manipur leh Myanmar atanga raltlan rawn lutte sawrkarin a enkawl dan an duhkhawp loh thu a sawi a, nakinah harsatna lian zawk a awm an hlau a, policy mumal tak hnuaia enkawl tul an tih thu an sawi.

AAP chuan Manipur buaina avangin July 23, 2024 khan Mizoram hmun hrang hrangah kawng zawh a nih thu an sawi a, amaherawhchu tun hnaiah ngaihven an hlawh zui tawh lo an ti a, buaina hi chenfel a ni loh mai bakah, Mizoram chu a nghawng nasat ber a ni an ti.

Tun dinhmunah raltlan engzah nge awmchiah tih pawh record mumal a la awm lo an ti a, vawiin ni thlengin raltlan chungchangah policy mumal kan la nei lo a, sawrkar hian hma la ngam se an ti a, tun dinhmunah buaina lian awm lo mahse, nakinah chuan harsatna lian zawk a nih theih avangin dan mumal tak sawrkar hian neih a ngai an ti.

Aam Admi Party chuan Manipur buainaa mawhphurtu berah Manipur CM Biren Singh chu an puh a, bang tura an duh thu a sawi. Tun hnaia social media lama voice recording chu CM Biren Singh-a tawng ngei nia an hriat thu an sawi a, hei hian an rilru a tihnat thu an sawi a, buaina chawk chhuaktu leh a hnu zelah pawh tan lam neiin rorelna thuthleng a hmang a ni tih a chet dan leh awm dan hian a finfiah a ni, an ti.