Aizawl: November 14 tlaia Maudarh khuaa ABCI lung lakna hmun (quarry) chimin a chhilh vanga thi ruang 11 lakchhuah a nih hnuah, ruang pakhat hmuh a la ni lo a, ngawrh taka zawn chhunzawm mek a ni.

K. Lalremruata, L.O, ABCI (NHIDCL) hnen atanga ZALEN thudawn danin, he thu ziah lai, nimin tlai thlenga ruang la hmuh loh hi Jahidul Islam (27) s/o Samsul Haque, Satrakanara, Assam lam mi a ni a, nimin chhun khan 199 Bn. BSF, Lunglei chu ruang zawng turin an uisathiam nen Maudarh an thleng a, Aizawl atangin 3rd Bn. MAP-te pawh an uisathiam nen nimin tlai khan an thleng bawk a, chawlh awm loin ruang zawn hna thawh a ni.

He thu ziah lai thleng hian quarry chimin excavator panga a chhilh zinga pathum lakchhuah a ni tawh a, ROC Compressor pahnih a la chhilh nia hriat a ni bawk.

ABCI lung lakna hmun, Maudarh hi nimin  khan Lawmawma Tochhawng, MLA, Vice Chairman, HPC, Lunglei chuan a tlawh a, Mizoram chhim lam kawngpui hrang hrang siam mek atana lung tha lakna awm chhun a hetiang chhiatna a thleng chu pawi a tih thu leh chhiatna avanga thite leh an chhungte a tawrhpui thu a sawi.

Chhiatna thlenga tlawmngaia thawk chhuak thin Leite, Maudarh, Rotlang mipuite leh hmun hrang hrang atanga tanpuina petute chungah lawmthu a sawi bawk.