Trinamool Congress MP Abhishek Banerjee chuan Nilaini hian Tripura khawpui, Agartala-ah roadshow a huaihawt dawn a, hei hi hmarchhak state-a kum 2023-a assembly inthlan lo awm tura an party-in bul an tanna lian ber a ni.

Banerjee-an hun a hmang tur hi Trinamool State General Secretary Kunal Ghosh chuan a sawi.

An party-a MP leh Bengal-a an MLA eng emaw zatin an tawiawm dawn niin a sawi bawk.

Trinamool hian Bengal inthlanah khan chiang takin BJP an hnen a, kum 2024 Lok Sabha inthlanpuiah pawh party che thei pawl ni ngei tumin huang zau an tum.

MLA bial 60 awmna, Tripura-ah lutin bial 40 chuang chu rorel lai, BJP leh an thawhpuite thut ni mah se pawh thlak theih an tum a. BJP rorelna hmun dang, Assam pawh an awn mek bawk.

Abhishek Banerjee-an Tripura a tlawh tur hi BJP worker leh CPM inkara tharum thawhna a thlen nasat vang lai tak a ni dawn a. CPM hian kum 1978 atanga 1988 thleng ro an rel hnuah kum 1993 leh 2018 thleng an rel leh.

Tripura CPM State Secretary thin, Baijan Dhar chuan an state-a party pahnih intihbuai mek kara Trinamool-in hun hmanna tur lian tak an ruahman chu tul lo a tih thu a sawi.

“Tripura-a kawng zawh leh rally nei tur hian tu party mah kan do lo va; mahse, Trinamool hruaitute hian kan dinhmun mek hi inthlana chak nan remchanga lak an tum tur a ni lo. Ni tin mai kan party miten beih an tawh pawh hi hrethiam ve tur an ni,” a ti.