October 26, 2022; Anti Corruption Bureau (ACB) Mizoram chuan tunhnai kum 2018 atanga kumin 2022 thlengin eiruk thubuai ziahluh (regular case) 20 an nei a, hemi hun chhung veka thubuai an chhui court in thiamloh chantirna (conviction) a puan thubuai 16 an nei bawk.

ACB tarlan danin, kumin 2022 chhungin eiruk thubuai chi hrang hrang 7 ziahluh an nei a, kum 2021 ah 4, 2019 ah 2, 2018 ah 7 ziahluh an nei. Hetihlai hian kumin 2022 chhungin ACB in thubuai an chhui, Special Judge for the PC Act, court in thutlukna (judgement) a puan a thiamloh  chantirna thubuai pahnih a awm a, chungah chuan mi 15 te hming a lang.

Kum 2021 ah court in thiamloh a chantir mi 3 awmin, 2020 ah mi 10, 2019 ah mi 6 leh 2018 ah mi 8 thiamloh chantir an awm. 

Court in thiamloh a chantir te hi a tlangpuiin, jail tang tur leh pawisa chawi tura hrem an ni a, hremna an hmuh erawh thubuai an neih a zirin a in ang lo a, thenkhat kum 6 jail tang tur leh Rs. 3,63,000 chawi tura hrem an nih laiin, thenkhat erawh thla 1 tang tur leh pawisa Rs. 10,000 chawi tura hrem te pawh an awm.