Aizawl: Aizawl City College joint Students Union chuan hripui leng karah an exam dawn avangin zirlaite zingah Covid 19 inrinhlelhna nei emaw, kai an lo awm palh anih chuan test na man leh anmahni inenkawlna zawng zawng tum sak turin sawrkar an ngen.

Nimina Press mite an kawmna ah ACCJSU hruaitute chuan Covid 19 hrileng chu a zual chhoh mek avangin exam neih hrih loh chu an duh ber a ni tih sawiin hemi atan hian Mizoram University thuneitute pawh an bia tih an sawi a. Mahse an dilna hi MZU in an remtih loh avangin zirlaite zingah hri kai an awm palh thei niin an sawi a. Hri kai an lo awm anih chuan exam chhunzawm lo turin MZU an ngen nghal a, exam luih tir an tum anih chuan dodal zel an tum dawn niin an sawi.

ACCJSU hruaitute chuan zirlai exam tur ten an exam na hmun an panna kawngah tumah harsatna lo siamsak lo turin mitin an ngen a. Boruak pik tak kara exam tur an nih avangin exam hall thlenga rilru tinuam lo thei zawnga buaina leh harsatna siam lo turin mipuite an ngen bawk.

Mizoram University chuan naktuk August ni 10,2020 atang hian under graduate te tan exam a buatsaih dawn a. ACCJSU chuan tunlai hrileng avanga veng thenkhatin total lockdown an puan avang te, zirlai thenkhat mahni chenna hmun leh hostel la rawn thleng thei lo te an awm avangin exam hun hi kar 1 a sawn hla turin MZU thuneitute an ngen a. Mahse MZU lam chuan exam hun an ruat chu a pangngai anga kaltlangpui tur a tum a ni.