Afghanistan khawthlang, Iranian nena an inrinaa lirnghing na tak avangin mi za tel an thi.

Thingtlang kilkhawr zawka thil thleng hriat kim a nih hunah thi zat hi tam tak an ni thei nia sawi a ni a, Taliban sorkara department pakhat chuan mi 2,000 chuang an nih a rinawm thu a sawi.

Inrinnia magnitude 6.3-a na lirnghing hian Herat khawpui hnaiha khaw 12 vel chu a tichhe vek a ni.

Nghing nawn (aftershock) na tak tak a thleng zui bawk a. Dam chhuakte chuan an chhehvela in tlu sup sup hmuh chuan a rapthlak hle tih an sawi.

Rescue team-te chuan Inrinni zan pawh khan zankhuain in chim kara tang dam chhuakte zawn hna an thawk.

Mi sang telin hliam an tuar a. An ram hi damdawi lama an intodelh loh zual lai niin hliam tuar tam tak chuan enkawlna an dawng mumal lo va. UN leh pawl dangte pawhin mamawh zualpui an thawn lut nghal mek.

Lirnghing hian Inrinni chawhma dar 11:00 (India-a chhun dar 12:00) velah Herat hmarthlang lam km 40 chuang hreta hlaah a sawi a ni.

A tuar na zualte hi hmun kilkhawr, an inte pawh hluma sak mai maite an ni hlawm a. “A nghin hmasak berah khan in tam tak a chim nghal a ni,” tiin Herat-a cheng, Bashir Ahmad chuan AFP news agency hnenah a sawi a, ani hi a chhungte heng thingtlang kilkhawra chengte hi an la ni hlawm.

“In chhunga lo awm laite chu a chim hnan,” a ti a. “Chhungkaw tam tak, an chin hriat loh an awm \euh a ni,” a ti bawk.

Taliban public health minister chuan Herat hi tlawhin chhiatna thlengte a en a. World Health Organization (WHO) chuan in 465 vel a chim niin a sawi.

Herat Central Hospital-a thil thleng thlalak leh video darhah chuan hliam tuarte chu intravenous drip khaiin damdawi in tual velah an awp sup sup a, rikrum a thlenin damdawi in hian a zo lo hle tih a lang.

Thlalak dangah Herat-a Injil district-ah chuan in chim leh thil chhiain kawng a hnawh a, hei hian chhanchhuah hna thawh pawh a tihsawt loh phah tih a lang.

“A rapthlak tak zet a, hetiang hi ka la tawng ngai lo,” tiin zirlai pakhat, Idrees Arsala chuan AFP hnenah a sawi a. Amah hi lir a nghin tana an classroom atanga hima lak chhuah hnuhnun ber a ni.

Herat hi Iran nena an inrina a\anga khawchhak lam km 120-a hlaa awm a ni a, ‘cultural capital of Afghanistan’ tih thin a ni a. He province-ah hian mihring maktaduai 1.9 vel an cheng a ni.

Afghanistan hi lirnghingin a lo sawi fo tawh thin a, a bik takin Hindu Kush tlangdung hi Eurasian leh Indian tectonic plate insutna lai a ni a, a sawi duh zual bik.

Nikum June thla khan Paktika province chu magnitude 5.9-a nain a sawi a, mi 1,000 chuang thiin mi sang tam takin an in leh lo an chân bawk.