Aizawl September 20, 2022 : Private Placement Agency Licence nei lo, Sawrkar hriatpui loh Agency, Mizoram-ah an awm tih an hriat avangin Aizawl Bawrhsap Pisa chuan hnazawng mek te fimkhur turin a chah a, sawrkar hriatpui Agencies te chauh dawr turin an duh tih an thuchhuakah an tarlang.

Thuchhuah chuan, fimkhur zawk nan leh hnathawhna-ah harsatna an tawh loh nan District mipui, Nu leh Pa te leh hnathawka chhuak tur te chu The Mizoram Private Placement Agencies (Regulation) Act, 2015 hnuaia Valid Licence nei, Sawrkar hriatpui Agencies te chauh dawr turin an hriattir a ni.

Bawrhsap Pisa chuan Aizawl District huam chhungah Private Placement Agency Licence nei lo, Sawrkar hriatpui loh, Agency lem engemawzat an awm an ti a, heng agency te hian State pawn leh Ram pawnah te hnathawk turin mi an tir chhuak thin an ti. Hei hi Constitution of India hnuaia Article 23 (1) in a tarlan ang chuan Private Placement Agency, licence nei lo te hi Mihring hmanga sumdawnna (Human Trafficking) -a inhnamhnawih-a ngaih an ni a, a hremna pawh a sang hle,an ti. 

DC Office chuan heng dana lova Placement Agency te hian mi hnathawk tura an tirh te an hnathawna hmunah harsatna an tawhin Sawrkar angin hma lak a harsa tawh thin a ni, an ti bawk.