Aizawl: Agriculture Minister C.Lalrinsanga chuan nimin khan Khawzawl, Khawhai, Sialhawk leh Chawngtlai khua a tlawh a, khawtlang hruaitute inkawm-hona neiin loneituten an mamawh hrang hrang an lo thlen te chu a tul ang zela a ngaihtuahpui tur thu a sawi.

Agriculture Minister chuan kuthnathawktute tan SEDP kal tlangin chak taka hmalak tum a nih thu a sawi a, hemi atan hian sawrkarin Agriculture Devolopment Board pawh a din fel tawh a, buh leh bal a intodelh chu an tum bulpui ber pakhat a nih thu a sawi a Kut-hnathawktute harsatna tawh thinte chhawk zangkhai turin Farmers Crop Insurance kalpui tan a nih dawn thu sawiin, a bultan nan thlai thlan chhuah bik thenkhatah kalpui phawt a ni dawn tih a sawi bawk.

Minister chuan sawrkarin kuthnathawktute tan pension scheme kalpui a tum thu sawiin, kum 18 leh kum 40 inkarte tan a ruahman rih phawt a nih dawn thu a sawi a. A chhawrtu an tam theihna turin kum bithliah pawh hei aia huapzau deuh a kum 50 ral kai tawhte pawhin an chhawr ve theih dan tur kawng zawn leh tum a nih thu a sawi bawk. Farmers’ Pension Scheme atan hian loneituten pawisa (premium) thla tin Rs 55 atanga 200 inkar pek a ngai a dawn a, kum 60 an tlin thleng an pek chuan kum 60 an tlin hnuah thla tin Rs 3000 an dawng thei dawn a ni.

Agriculture Minister chuan, “Ram changkang zelah Chemical Fertilizer hmanga thlai tharte thinhrikna a lian chho zel a, chumi thlakna tur chuan Bio-fertilizer leitha kan thlai chinten a ngaih em em tur heti lama mi thiam bikte nen siamchhuah hna kan thawk dawn a, hemi tana hmalakna tur hian sawrkarin Rs vaibelchhe 1.7 a ruahman tawh a. Kuthnathawktu ten leitha taksa tan pawha hlauh-awm loh tur an hman theih tur kan siamchhuak dawn a ni,” a ti bawk.