Aizawl: Agriculture Minister C.Lalrinsanga chuan nimin khan Aizawl Chanmari-a Lengteng bial Pawlrang khua dawnfawh thar, Mawmrang Farmer Producer Company (FPC) ten an hralhsakna hmun a tlawh.

Minister C.Lalrinsanga chuan Lengteng bialin hlawhtling taka dawnfawh an tharchhuak chu lawmawm a tih thu leh Zoram mipuite chu mahni ram dawnfawh thar ngei mai chu kut hnathawktute hamthat nan tlawmngaia leisak turin a ngen bawk.

Mawmrang FPC hotute chuan Lengteng bial kut hnathawktuten an dawnfawh thar chhuah hralh kawngah harsatna an tawk tih hriain a hralhna lamah an puih thu leh a juice te siamchhuah saka an tihral pui mek thu an lo hrilh a ni. 

Lengteng bialtu MLA Dr. Thangmawia chuan a bialah kut hnathawktu taima tak tak an tam thu leh Dawnfawh hi kumin hian a bialchhung Ngopa, Lamzawl, Chiahpui leh Pawlrang khua ten hlawhtling taka tam tham tak an thar thu sawiin a hralhna lama tlawmngaih chhuahpuitu Mawmrang FPC leh Clover Organic Pvt. Ltd. te chungah a bial mipuite aiawha lawmthu hrilhin, dawnfawh chingtute tanpui nan a bial thar dawnfawh chu mitin ten tlawmngai a lo leisak chhunzawm zel turin a ngen bawk.