Aizawl February 1, 2024: Agriculture Department chuan vawiin khan Directorate of Agriculture Department kaltlanga hmalakna hrang hrangte thlirletna leh hmalak zel dan turah inrawnkhawmna an nei a, he hun hmanpuitu Agriculture Minister P.C. Vanlalruata chuan 'Market First' chu an ngaihpawimawh a nih tur thu a sawi.

Agriculture Minister chuan Agriculture chu kum tam tak chhung thar tam lam tinzawn (production based) ringawta a kal thu sawiin, tunah chuan thar chhuahte hralhna lam tinzawn (market based) hmanga kalpui tum a nih thu leh 'Market First' ti a kal chu a hun tawh takzet thu a sawi a. Sawrkarin a hralhna tur lam ngaipawimawhin Sawhthing, Aieng, Hmarcha leh Hmunphiah hralhna tur sum a dah thu leh rate mumal tak a duan thu sawiin, nakum budget pharh hma ngeiin buhfai rate pawh siama loneitute tana puanzar hman tum a ni, a ti. Tung pawh sawrkarin a ngaih pawimawh dawn a ti bawk.

Tun hnaiah sawrkar laipui hotute Agriculture tihhmasawn nana dawr a nih thu sawiin, buh leh thlai tam zawk thar theihna hmun potential area cheibawl bakah farm mechanisation ngaih pawimawh tum a nih thu a sawi bawk.

P.C. Vanlalruata chuan loneitute hriat chian a tul thu leh a luhrum atanga ang khata thuai mai a rem loh thu sawiin, awmze nei zawka hmalak a nih theih nan Digital Agriculture Mission hmanga hmalak ngaih pawimawh a nih tur thu a sawi a. Sawrkar tharin mimal ni lovin Society behchhana hmalak a ngaih pawimawh thu leh hemi tur hian Line Department dangte nena thawhho dan tur ngaihtuah tlan a tul dawn a ni, a ti.

Sustainable Agriculture tihhmasawn leh ngaihpawimawh tum a nih thu leh compact area-ah awmze nei zawka hmalak tum a nih thu sawiin, sum siam nana hmun hrang hranga hmalak aiin hlawhtling ngei turin hmasawnna ruhrel neihte hmang tangkai tura tanlak tum a ni, a ti bawk.