Aizawl September 14, 2022: Vawiin khan New Delhi-ah Outlook Agri Tech Summit and Swaraj Awards-ah Mizoram sawrkar aiawhin Agriculture Minister C. Lalrinsanga chuan 'Best performing State in Agriculture among the North East States' lawmman a la a. Union Agriculture Minister Narendra Singh Tomar chuan lawmman hi a hlan a ni.

Outlook Tech Summit and Swaraj Awards hi New Delhi-a A.P Shinde Symposium Hall, ICAR (India Council of Agriculture Research) compound-a neih niin Agriculture leh a kaihhhnawiha India ram hmun hrang hrang atanga mithiam ten subject hrang hrangah presentation an nei. Outlook Tech Summit-ah hian Swaraj Award hi sem niin category hrang hrang - Outstanding KVK, Outstanding FPO, Outstanding Scientist, Outstanding Institutions, Outstanding Farmer Cooperatives, Outstanding State, Outstanding North East State, Outstanding Union Territory leh Outstanding Innovative Farmer ah te Award hi sem a ni a. Mizoram chuan 'Outstanding North East State in the field of Agriculture' a dawng a ni.

Summit ah hian thu sawiin Agriculture Minister C. Lalrinsanga chuan, "Mizoram chu foreign ram dang pahnih karcheha awm a nih angin India ram tan cultural Ambassador hna pawimawh tak a thawk reng a. India ramin Mizorama hmasawnna a ngaihpawimawh dan chu khawchhak ram hrang hrang te laka India hmel lanna hlimthla pawimawh tak a ni. Mizoram-in Agriculture ah, a bikin Organic leh Natural farming-ah theihna tam tak a nei," a ti. India tana thil hlu tak a nih avangin Agriculture leh a kaihhnawiha North East tan bika scheme siam belh turin Sawrkar laipuiin tan lak a ngaih thu a sawi. "India ramin Be (Pulses) tharchhuah kawnga indaihlohna nasa tak a hmachhawn mekah Mizoram leh North East state te chuan organic leh natural farming mode hmanga thar turin theihna bik kan nei a ni," a ti bawk. 

Mizoram Agriculture Minister chuan, "Outlook Tech Summit and Swaraj Award-a 'Mizoramin Best performing North East State in the field of Agriculture' lawmman a lak chu Agriculture lama thawktute, a bikin kan loneitute leh sawrkar thawhhona tha tak rahchhuah a ni," a ti a, Mizoramin he award a dawng hian Mizoram Loneitute leh Mizoram Sawrkar-in theihtawp chhuah a, tlawm taka hma kan lak ve na te chu India ram hian min hriatpui a ni tih a tichiang a. He lawmman hi Mizoram loneitute tan ka hlan a ni, a ti.

Mizoram hian Kum 2021 khan ram pum Good Governance Index ah Agriculture and Allied Sector in Hill States Category ah Lawmman pakhatna kan lo la tawh bawk a ni.