ZALEN February 18, 2025 : AH & Veterinary Minister C. Lalsawivunga chuan Selesih A.H & Vety Farm ah Durtlang leh Sihphir-a bawng vulhtu mi 41 hnenah a thlawnin bawngchaw tur buhpawl a semchhuak.

Thenzawl Vety Farm-a ran chaw (fodder) chinna hmun acre 57 a zau chu Minister C. Lalsawivunga hovin kum 2023-24 chhung khan acre 70-a zauhvin, a vaiin acre 127 a huam a. Selesih Hay House atangin vawiin hian fodder tharchhuah te hi a thlawnin semchhuah a ni.

Ran chaw semna pual inkhawm, Selesih AH & Vety Rest House ah neih ah Minister C. Lalsawivunga chuan, bawnghnute, artui leh sa a intodelh tur chuan ran chaw atanga bul tan a ngai a ni, a ti a. A chaw a intodelh hmasak loh chuan a intodelh tak tak theih loh tur thu a sawi a. Hemi kawnga hmalakna neih mekah department lama thawktu ten kuthnathawktute tan thahnemngai taka inpekna tak tak nen an thawhna chu lawmawm a ti a. Minister chuan bawng vulhtute thawhrimzia fakawm tiin, kuthnathawktute'n khawsak dinhmun tha zawka hlankai chu sawrkarin a ngaihpawimawh thu a sawi a. State sum indaihlohna karah a theih chin china hmalak pui zel an nih thu thu a sawi.

Minister chuan department thawktu leh farmer kalkhawmte chu ram innghahna leh hnam zahawma kan insiam theihna tura mawhphurhna kengtu an nih thu a sawi a. Kuthnathawktute thawhchhuah chu ram economy chawisan na niin, an ni tello in sawrkar a kal thei lo a ni a ti a. Chhel takin taima taka thawk turin a fuih a ni.