Aizawl July 28, 2024 : Mizoram State Aids Control Society (MSACS) chhinchhiah danin Mizorama HIV+ hmuhchhuah tawh zat chu mi 28,028 an ni a, chung zinga a tam ber chu thalai kum 15-49 inkar an ni a. HIV inkaichhawnna tam ber chu mipat hmeichhiatna niin thihpui mi 5,021 an awm tawh.

MSACS report thar bera a lan danin Mizorama HIV hrik pai hmuh hmasak ber, October, 1990 atanga kumin March thleng khan Mizoramah thisen nuai sarih bawr vel endik ni tawhin chung atang chuan HIV hrik pai mi 28,028 hmuhchhuah a ni tawh.

Kumin March thla thleng khan Mizoramah HIV/AIDS vanga thi mi 5,021 an awm tawh a (AIDS vanga thi hi kum 2005 atangin chhinchhiah tan a ni), chung zinga mi 3,303 chu mipa niin hmeichhia 1,634 an ni a, mi 84-te chu naupang an ni.

Antiretroviral therapy (ART) la mi 22,318 an awm laiin, ART registration ti zawng zawng chu mi 24,864 an ni.

Kum 2006 chin atanga chhinchhiah chinah HIV/AIDS kai tam ber chu kum 25-34 inkar an ni a, 2006 atanga kumin March thlengin hemi kum huang chhungah hian HIV/AIDS kai mipa 8,463 leh hmeichhia 3,244 an awm a. Kum 35-49 inkarin dawtin, kum 15-24-in an dawt.

MSACS data atanga a lan danin Mizoramah kum tin HIV/AIDS kai thar hmuh chhuah mi 2,000 bawr vel an awm ziah a, tun hnai kum nga chhungin kum 2020-21, 2021-22-ah mi 2,000 an kai lo a, a bak kum dang zawngah chuan HIV/AIDS kai thar hmuh chhuah mi 2,000 an tling vek.

HIV kai hmuh-chhuah thar zat

2018-19   - 2,557

2019-20   - 2,338

2020-21   - 1,900

2021-22   - 1,601

2022-23   - 2,233

2023-24   - 2,059