ZALEN March 3, 2025; Mizoram sawrkar hnathawk aikal la an awm sawrkarin a hre tawh lo a, hetihlai hian aikal lo la la an awm a nih chuan, anmahni leh a thawhna officer chungah hremna lek a ni dawn tih GAD changtu chief minister in a sawi. 

Vawiin (3.3.25) assembly budget session a zawhna leh chhanna hunah Thorang bialtu MLA, MNF member R Rohmingliana zawhna leh member dangte zawh belhna chhangin GAD changtu chief minister Lalduhoma chuan, sawrkar hnathawk aikal lak chungchang-ah grace period an siam tih sawiin, "Insiamrem turin kan ti a, chumi a pelh a man chhuah te chu action lak tur kan ti. Aikal la an lo la awm a nih chuan anmahni leh a thawhna a officer lo chhawrtu, an pahnih chungah action kan la ve ve tawh ang, hei chen hun kan hawng tawh a, chu pawh zah lo a lo la tilui an awm a nih chuan hremna an tawh ang angah an phunnawi thei lo ang," an ti bawk.

Aikal lak chungchangah inhriatthiamna a awm lo tih sawi bawkin, chief minister chuan, department tinah service review committee din vek tura tih an nih thu sawi bawkin, "Chungte chuan an department theuh a hnathawkte, eng vang pawh a an hna thawk chhunzawm lo te tan special valuntary scheme a buatsaih sak a, chumi hnuaiah chuan thawk thei lo chu an chawl mai tur a ni," tiin a sawi. "A pawng a pui inban kan tum lo a, rilru nuam taka an chawlh theih dan kawng hawn sak an ni," a ti bawk.