Aizawl: All India Professional Congress (AIPC) Mizoram Chapter chuan National Education Policy 2020 chu hnam hnufual zawkte tan a him lo tih an sawi.

Nimin khan Aizawl Press Club-ah chanchinbumite kawmin AIPC Mizoram chapter president Dr. Henry Zodinliana Pachuau chuan, “National Education Policy 2020 ah hian school level-ah tawng chi thum hman ngei ngei tura duan a nihna hian hnam hnufual zawk, Hindi tawng hmang lo tan harsatna lian tak a thlen dawn a ni,” a ti a.

Three language policy hi hman anih chuan Hindi, English leh Mizo tawnga lehkha zir a ngai tawh dawn nia sawiin, “Zirlai phai lama lehkha zir tur tan phei chuan Mizo zirtirtu awm lohnaah chuan mahni tawng ni lo Indian language dang an zir a ngai dawn a, harsatna nasa tak a thlen dawn a ni,” a ti.

National Education Policy chu zirna in sang zawkahte kalpui tan a ni tawh nia sawiin, “India ram zirna in sanga sawrkarin sum a pek thin pawh a ti tlem tial tial ang a, a tawpah phei chuan thaibo a ni dawn a. India rama college/university hrang hrangah fee a sang tulh tulh ang a, phai lama in zirtir a har tawh dawn a ni,” a ti bawk.