Aizawl: Air India bak Lengpui atanga thlawhna service turin Go Air chuan an tichiang tawh a, Indigo erawhin service tum mahse an service hun tur an la tichiang thei lo.

Principal Consultant, Aviation Wg.Cdr. J.Lalhmingliana hnen atanga Zalen thudawn danin Go Air chuan October ni 15,2019 atanga Kolkata-Guwahati- Aizawl-Guwahati- Kolkata service an tum thu an tichiang tawh tih a sawi a. Hetih lai hian Indigo pawh Aizawl ah lo kalin thil tul te an rawn enfel a, October ah chuan service tan an tum thu an sawi a, mahse a hun tak erawh an sawichiang lo niin a sawi.

Zalen palaiin thlawhna ticket pechhuaktu, travel agent pakhat a biakna ah Go Air hian October ni 15-26 thleng ticket an hralh tih a sawi a. October ni 26 hnulam an pekchhuah loh chhan hi thlasik anih dawn tawh avang leh Lengpui tumhmunah zing karah chuan chhum a zin thin vang nia an rin thu an sawi.

Tuna ruahman dan chuan Guwahati atangin zing dar 6:50 ah lo chhuakin dar 7:50 ah Lengpui a lo thleng ang a, zing dar 8:40 ah chhuakin 9:50 ah Guwahati thleng leh tura beisei a ni.