January 26, 2023; Tunhnai a ramri a harsatna thleng, Vairengte Aitlang hnar lam, Assam ramri hnaiha Vairengte mi, hmunphiah hun nei chhungkaw 20 ten Assam police (AP) te laka harsatna an tawh chu a ziaawm rih a, hetihlai hian February 5 chho atangin an hmunphiah te an seng dawn a, boruak a tha zel angem tih sawi mai a la harsa rih. 

Aitlang hnar lam a hmunphiah huan nei mi thenkhatte hnen atanga ZALEN thudawn danin, Assam police ten tun January ni 13 a an huan a kal an phalsak loh hnu-ah Vairengte SDO (Civil) leh SDPO te, Mizoram leh Assam lam post commander te inbiakna angin tunah chuan huan neituten Assam police te lakah harsatna tawklo in an huanah an kal thei tawh a, hetihlai hian Assam police lam te duty an inthlak chuan boruak pawh a danglam leh thei nia ngaih a ni. 

Hmunphiah huan neitu chhungkaw 20 a mi 46 vel te chu ID card siamsak an ni a, chung an ID te chu Assam police te hmuhtir ngailo in an huanah an tlang thei a. Huan neitu thenkhat chuan Assam police lam te duty a zirin harsatna an tawk thin ni ah an ngai.

February ni 5 chho atangin an hmunphiahte an seng dawn a, tun dinhmunah boruak tha rih mahse, an awm zel dan tur sawilawk a harsa niin huan neitu thenkhat chuan ZALEN an hrilh a, an hmunphiah te harsatna awm lo a seng theih chu an duh ber a nih thu an sawi.