Aizawl: Lengpui Airport-a IndiGo thlawhna Aizawl - Agartala- Guwahati service thar lawmna hun chu nimin khan Chief Minister Pu Zoramthanga hoa neih niin flight hi vai liam nghal a ni. Regional Connectivity Scheme (UDAN-RCS) hnuaia IndiGo in India hmarchhak state zinga service an neihna khawpui 6-na Aizawl chu a ni ta a ni.

IndiGo flight service lawmna inkhawmah Chief Minister chuan Lengpui airport in airline service thar a nei belh chu Mizoramin a chhawr tangkai hle tur thu a sawi a. Guwahati nen a inkalpawhna service a awm belh mai bakah Lengpui atanga thlawhna route la awm ngai lo, Agartala khawpui pawh IndiGo service hian a telh chu lawmawm tiin Lengpui Airport chu changtlung zawka siam turin hmalakna a kal mek zel thu Chief Minister chuan a sawi a. Lengpui atangin India ram khawpui direct flight a la awm a beisei thu a sawi bawk.

IndiGo Airlines Vice President Vijay Matta chuan Aizawl thleng theia an hmalakna an zauh ta chu lawmawm a tih thu a sawi a. RCS hmalakna hnuaia India hmarchhak state zinga state parukna an service-na tur niin, Aizawl chu IndiGo thlawhna domestic destination 62-na leh a pum pui chuan destination 85-na a nih thu a sawi a. Kolkata leh Delhi flight-te pawh a remchan dan anga la siam zel an beisei thu a sawi.