Aizawl mihlun pawl dinna khawpui Aizawl-ah Aizawler ni lovin, thingtlang tlangval te football final khel kan en dawn! Aizawl tlangval te an duap ta nge, futsal-in a eichhe zawk?

Vawiin chawhnu dar 3:00 hian Zoram mipui en chak, LBS Suzuki All Mizoram Inter Village Football Tournament 2022 final chu AR Lammual-ah Sialhawk VC team leh Champhai Kanan VC team ten an khel dawn a, team 204 telna tournamet-a team tha pahnih inkhel tur hi a nep dawn lo.

An khelh dan leh an kal chho dan enin khawi team zawk zawk pawh hian champion an phu. Final thleng tura an kalkawng en chuan Champhai Kanan team kalkawng hi a hautak deuh zawk niin a hriat. Champhai Kanan hian champion beisei phak Lengpui VC, Republic Veng LC, Vaivakawn LC, leh Serchhip Jt. VC te an tudawl thei. An final zinkawngah hian penalty hmanga an hneh team thum ngawt an awm a ni. Sialhawk VC team hi tun tournament-a team boruak nei lian ber an ni a, an tumpui team thenkhat phei chuan an khan lo hle a, Selesih LC phei chu 13-0 zetin an hneh a nih kha. An final zinkawngah semi-final a Ramhlun North LC te penalty hmanga an hneh tih loh penalty hmanga chinfel ngai khawp harsatna an hmachhawn lo. 

A hmuhnawm dawn em?
Hmuhnawm dawn e, tiin chhang ila tun min hnial lovang. Passing game hmuhnawm tak min fah tawh tu team te kha an ni miau a, a hmuhnawm lo thei lo. Mualchhung inkhel mai bakah fans thawm a ring dawn tih a chiang reng bawk. Fans nei tha ve ve inkhel hi a hmuna enna i chang lo a nih pawhin Zonet-in youtube atangin live-in an pechhuak dawn a, tun tournament a team huhang ngah ber team hnih inhmachhawn tur hian boruak an nei lian a, thiam ber zawnna final a ni bawk nen mipui an pungkawm tam dawn tih a chiang. 

Team innghahna leh goal thun thei pahnih Danmawia leh Tharpuia (Luvara) te pahnih inhmachhawn tur hi Lammual pan nachhan tling chu a ni ve hrim hrim.

Mual chhunga mahni naute hneh taka hotu Champhai captain Chhawnkima'n leh a dinpui Ramnghaka nen tlarhnung an mawi leh ngeiin a rinawm a, paltlang an har lehpek ang. Ball thiam leh tlan chak pahnih Tharpuia leh Zozoa te inkawp Ramsanga'n muallai atangin a chawm leh dawn bawk a, an kiangah JH-a leh Jessie-a te an ding mai mai dawn hauh lo bawk. Sialhawk defender Muankima, Chhanpuia, Ramhluna leh Famkima te tan chuan an tawrhhlelhawm khawp ang le. 

A khelhna a piangah nomawi-in a um emaw tih mai tur R. Laldanmawia Sialhawk-i'n an nei hi an thlamuanpui tih a chiang a, a zarah a team-mate ten mahni inrintawkna nasa tak an nei ti ila kan sawi sual lovang. Zoram pum huap in elna lian Red Ribbon Football-a Durtlang leh Chanmari champion pui thei, Mizoram Premier League leh North East huap nomawi chawi tawh Danmawia hi a pawl te tan chuan thlamuanpui tham a ni ve reng a ni. 

Mahni khawtual-a, mumal taka football league/tournament kalpui thin Sialhawk ten an thawhrim rah an seng mek niin a lang a, Danmawia bakah hian Crespo te, Rotluanga leh Duata te hi chetla hi Sialhawk fans tan chuan thlamuanpui tham an ni ve reng reng. 

Mizoram pum huap football inelna final la khel ngailo nimahse, team pahnih te hi an khel a mawi a, awmze neiin ball an khel a, vawiin hian chak zawk bik tur rinthiam a har. Tu team zawk zawk pawh champion se, an vawi khatna a nih dawn vangin an lawmpuiawm dawn hle a ni.            

Aizawl team hnufual chhan Futsal?
Phat rual lovin Aizawl-ah hian tunhnaiah football aiin futsal a lar zawk a, football khel ngai em em lo thlengin thalai intawllenna hmanraw tha ber pakhat a ni chho. Man chawi a khelh ngai futsal ground, veng kilkhawr tak tak ami a lun em em  laiin, a thlawna khelh thei veng laili a awm football field erawh a ruak hei hui thung. A awmzia chu Aizawl footballer te hian football pangai aiin futsal an khel nasa zawk tihna a ni.

Tun Inter Village tournament-ah hian Aizawl LC team hrang hrangah futsal khel thang, player tha tak tak an awm nual, mah se beisei angin an langsar tlat lo. A chhan ber ni a lang chu, Futsal leh Football hi a ground a in lenhleih em avangin player lut thei pawh a intam hleih a, chu chuan formation a khawih kawlo vek a, khelmual a tet miau vangin futsal khel thin te ground zauah an buai lo thei lo. Tin, futsal ball hi a tein a rit zawk a, ball control-ah football chiah khel thin ho aiin bahlahna an nei lo thei lo. 

Engpawhnise, final hmuhnawm tak en turin AR Lammual lam i pan phawt mai ang u.