ZALEN May 30, 2024 : May 27 zan leh a tuka ruahsur avangin Aizawl chamtu ber Tlawng-a Greater Aizawl Supply Phase I & III tui pump na khawl a chim avanga harsatna chuan ziawm lam a la pan thei lo a, Tui sem leh hun tur a la hriat theih loh a, khawl hi a pangngai anga a kal hun tur a chiang thei lo leh zual.

Tuiin a chim ve loh Phase II pawh hi power supply an pekna ber Phase I khawl a chhiat avangin a nung thei lo a, mahse, Phase II bika hman tur hi Diesel Generator Set thar an neih sa hmanga tui Pump dan ngaihtuah mek a ni a, mahse nikhata tui 24 Million Liter per Day (24 Mld) (Nikhatah tui litre nuai 240) pe thin khawl hian Generator hmang hi chuan ni khatah tui 8 Mld bak a pump chhuka thei dawn lo a, ni hnih hnu velah chuan pump tan theih an beisei tih Er. Lalrinzuala Ralte, Superintending Engineer, PHE Aizawl Watsan Circle chuan a sawi.

Greater Aizawl Water Supply Phase III pawh hi tuiin a chim a, a chin hriat theih a la ni lo a, Setlak atanga tui pump hi hi 37 Mld pump theihna tur niin tunah hian nikhatah 10 Mld vel an pump thin a, a nih tur ang taka chhawr la la ni lo hrim hrim a ni. Phase I&II hian a pangai ang chuan ni khatah tui 29 Mld vel an pump chhuak thin a, Phase III in a pump chhuah 10 Mld nen nikhatah tui litre 39 vel chu Connection 79,322 hnenah sem a ni thin a, harsa lutuk lovin Aizawl hi an chawm thei a, tun dinhmunah ni thum vel chu tui pump a ni tawh lo a ni.

Khawl chhiat leh chhiat loh hre tur hian a hmunhma tihfai nan ni thum vel tal a ngai dawn tih PHE lam chuan an sawi a, chumi hnuah khawl hi a chhiat leh chhiat loh an enchhin thei dawn chauh tih an sawi bawk.