Aizawl July 19, 2022 : Deputy Chief Minister Tawnluia chuan vawiin khan Lammualah LBS Suzuki All Mizoram Inter Village Football Tournament, Final Match kharna programme a hmanpui a, Tournament lian neih leh hunah chuan Lengpui leh Sairang-ah te inkhel ngai tawh lovin Aizawl khawpui ah ngei a rualin hmun 6/7 -ah a ruala inkhelh theih a beisei thu a sawi. 

Deputy Chief Minister chuan, Mizoram Sawrkarin thalaite tan infiamna hmun hma buatsaih kawngah theihtawp a chhuah mek a ni tih sawiin, covid hripui leng avang erawh duhthusam angin hma a lak theih loh a, Chief Minister kaihhruaina hnuaia Sports & Youth Services kaltlangin a theih ang angin hma lak chhoh mek a ni, a ti. 

Tawnluia chuan, "Aizawl khawpuia football khelhna tur field puitling 2 chauh kan neih hian min dawl tawh lo, UD & PA Department hnuaia Smart City Project katlangin Aizawl khawpui chhunga khelmual 6 ah phullem phahna tur tender mek a ni. Hetianga Tournament lian neih leh hunah chuan Lengpui leh Sairang ah te inkhel ngai tawh lovin Aizawl khawpuiah ngei a rualin hmun 6/7 -ah a rualin a inkhelh theih tawh ang," tiin, a beisei thu a sawi.

Dy. Chief Minister chuan, Lammual chu Mizo mipui rilruah a lian-in kan ngaihlu hle, a ti a, I- League Match inkhelh theihna tura chei leh ruahman sawrkarin a tum tih a sawi. LBS Suzuki All Mizoram Inter Village Tournament chu inelna satliah a ni lova, Mizoram thalai ten hma lam an panna tur a ni, tiin, Mizoram mai ni lo Mizoram pawna Football Club te pawhin player tha te thurchhuakin an club zawm turin an ziahluh mek, nia a hriat te chu he tournament hlawhtlinna lian tak a nih thu a sawi.

Final Match-ah hian Champhai Kanan VC Team chuan Sialhawk VC Team 2-0 a hnehin an champion a ni.