ZALEN March 26, 2025; Vawiin khan Aizawl khawpui bawlhhlawh paihna hmun, Solid Waste Management Center (SWMC), Tuiriala bawlhhlawh tawih thei lo (dry waste) paihna chu a kang a. He thuchhuah lai thleng hian Fire & Emergency Services Department leh Aizawl Municipal Corporation-a thawktuten theihtawpin thelh hna an thawk mek a ni. 

AMC thuchhuah tarlan danin, kang thelh hna tibuai lo tur leh kangmei chhuak avanga chhiatna nasa zawk thleng thei veng turin SWMC, Tuirial hi khar rih (temporarily closed) a ni a; thuchhuak awm leh hma chu bawlhhlawh paih theih a ni lo ang. Hei hian PPP mode-a local council kaltlanga khawn leh private bawlhhlawh paih zawng zawng a huam a ni.

SWMC, Tuirial chhungah phalna nei lovin tumah luh phal a ni lo a, ragpicker leh scrap dealer te pawh luh phal a ni lo. He khapna hian sawrkar leh AMC official, kang thelh hna thawktute a huap lo ang. Bawlhhlawh paihna hmun khar lailawk a nih avang leh khar hun chhung tur hriat theih a nih loh avangin Aizawl khawpui chhungah bawlhhlawh lo khawn rih lo turin local council zawng zawngte hriattir an ni. Mipuite pawhin mahni inah tha taka bawlhhlawh lo khawl tha rih tur leh tuiluan kawr leh lui dungah te, paihna hmun tur ni lovah te paih lo turin AMC chuan a ngen.