Aizawl: SIPMIU in Tuirial bula Aizawl khawpui bawlhhlawh sawngbawlna hmun thar Solid Waste Resource Management (SWRM) Centre an siam chu hman theihin peih a ni tawh.

Zalen palai zawhna chhangin SIPMIU thawktute chuan bawlhhlawh sawngbawlna hmun thar ah hian hna engkim thawh zawh la ni chiah lo mahse hman theihin peih a ni tawh tih an sawi a. SWRM-a bawlhhlawhte hi a tawih thei leh tawih thei loah thliarin a tawih thei chu mechanical compost leh vermi compost-ah thenin lei thate hi hralh leh thin a ni dawn tih an sawi a. Bawlhhlawh tawih thei lo pawh thliarin a hralh theih chi chu hralh a ni ang a, hman nawn theih loh chi erawh chu tha taka phum thin a ni dawn niin an sawi bawk.

Hetih lai hian Aizawl Municipal Corporation (AMC) thawktute chuan bawlhhlawh sawngbawlna hmun thar chu SIPMIU lamin hman theih ti mah se an duhthusam a la ni lo niin an sawi a. SWRM hi an hman nghal mai chuan siam lohin a awm hlen ang tih an hlauh avangin tun dinhmunah chuan bawlhhlawh paih hrih loh an tum niin Zalen palai an hrilh.

SWRM Centre, Tuirialah hian bawlhhlawh tawih thei lote sawngbawlna hmun tur Waste Resource Centre ah nitin bawlhhlawh 74 Ton chu mihring hmanga lo thliar hrang lehin hralh chhawn tura siam tum a ni a. Bawlhhlawh tawih thei 72 ton atanga 50 ton bik lei thaa siam theihna khawl (Mechanical Compost Plant) pakhat awmin bawlhhlawh tawihthei ni tin 22 ton sawngbawl theihna tur changpat hmanga lei tha siamna hmun (Vermi Compost Plant) a awm bakah bawlhhlawh tawih thei leh tawih thei lote hman nawn leh suma chantir theih loh, bawlhhlawh paih zawng zawng atanga 20% - 23% vel paihna tur hi Tuirialah vek hian a phum bona hmun Engineered Sanitary Landfill, 7900 square meter a zau, kum 25 daih tur chu hman mai theih tura peih fel tawh a ni. Hetah hian bawlhhlawh tangkai loho hi paih a nih hmain geomembrane (polythene puan tha chi) phah chhuah vek ani a, he mi chungah hian ni tina kan bawlhhlawhte hi paih a ni ang a, chu chu leiin chhilh leh nghal zel a nih hnuah road roller hmangin chil muk zel tur a ni.