Aizawl: Central YMA huaihawtin Zirtawpni zan khan Aizawl khawpui chhunga branch hrang hrang office bearer-ten Vanapa Hall-ah intawhkhawm an nei.

He intawhkhawm hi Central YMA President R. Lalngheta’n kaihruaiin thupui pahnih ‘YMA kalphung inzirtirna’ tih leh ‘Ram leh hnam humhalh nan ruihhlo do’ tih ngaihthlak a ni.

Thupui 1-na chu Prof. Lalnuntluanga, General Secretary, CYMA chuan sawiin, “Khawvel hmasawn mek zel angin YMA pawhin hma kan sawn ve mek zel a. YMA thatna tura ngaihtuahna seng tam tak an awm mek zel laiin YMA hmalakna tawh phawt chu a do zawnga ke pen duh an awm ve zel a ni,” a ti a. YMA hian a kal zelna turah kawng tha zawk a zawh theih nana thurâwn petu, hmalatu leh ngaihtuahna seng thin hruaitu kan mamawh thu sawiin, sawisel ngam loh pawl (YMA) kan nih a hlauhawm thu a sawi bawk.

Thupui 2-na, ‘Ram leh hnam humhalh nan ruihhlo do’ tih chu Lalhmachhuana, Central YMA Vice President leh Kumpuan Sub-Committee Chairman ni bawk chuan a sawi a. “Kan ram, kan hnam hi kan vanduai hle mai a, international boundary ven hneh si loh thui tak mai, inkalpawh awlsam em em si kan nei a. Hei hian ruihhlo leh dan lova sumdawnna (smuggling) tawlh rukna kal kawng kan ni a. Hnam tlem leh naupangtê kan ni a, kan population atanga chhut hian ruihhlo ngai kan tam lutuk hi a manganthlak tak zet zet a ni,” a ti a. “Kan thalai tam tak ruihhlo lak atanga chhan chhuak tur hian kil tin atangin kawng hrang hranga tan kan lak a ngai a ni,” a ti bawk.

Thupui pahnih ngaihthlak a nih hnu hian sawihona hun hman a ni a. Ruihhlo do chungchangah Central YMA committee sângin ruahmanna siam sela, khawpui chhung branch hruaituten lo ngaihchan nise an ti.

Aizawl khawpuiah hian YMA Branch 108 awmin Zirtawp zan intawhkhawmah hian branch 97 aiawh an tel a. Central YMA OB leh Central Executive Committee (CEC) member-te nen an vaiin mi 440 an tel a ni.